以巴衝突再度升級,以色列被指空襲加沙的醫院造成重大死傷,油價反彈至88美元,10年債息升至16年新高,美股壓力重重,三大指數顯著下跌,道指跌332點,標指跟納指分別跌58點及219點,VIX回升至19水平之上,留意若重返月初高位20.88,或拖累美股進一步向下。港股噚日再失10天線,隔晚反映中概股嘅金龍指數跌逾2%,恒指於ADR再跌近200點,回落至17500至17600水平,今早順理成章低開,更失守10天線(017714)及20天線(約17629)。
恒指低開192點,開市價17540已經係半日高位,失守10天及20天線後跌勢加劇,最多跌362點,見17369半日低位。中午恒指收報17386,接近半日低位,跌345點;國指跌130點,報5954;恒科指報收3701,跌78點。半日成交額453.47億元,個市落咗嚟接近今年低位,都仲未見有資金肯入場買貨,睇嚟前底17100水平都凍過水。
美債息高企,科技股全面受壓,京東(09618)自從畀多間大行下調目標價及評級後,表現弱過藥煲,今日上半場再跌逾半成,失去紅底股身份。百度(09888P)亦跌近半成,美團(03690)跌3.2%;騰訊(00700)跟阿里(09988)分別跌1.6%及1.8%;網易(09999)及攜程(09961)亦跌逾1%。重磅科企只有小米(01810)維持強勢,半日逆市再升1.2%。
雖然阿爺日前曾經派國家隊匯金入場買內銀A股,但A股唔見有起色,有人話內銀可能見底,都係一廂情願嘅諗法,始終無外資跟進,國家隊亦唔撐得幾耐,今日幾隻國有內銀股都要跟個市跌超過1%;而無國家隊入場嘅招行(03968),半日更跌4.3%。A股日日插水,上證今日創52周低,平保(02318)跟國壽(02628)半日分別跌3%及5.2%。至於本地金融巨頭,友邦(01299)半日跌3.1%,大笨象(00005)跌1.5%,港交所(00388)跌1.8%。藍籌之中只有6隻股份上升,而噚日急跌嘅聯想(00992)半日反彈3.8%,表現最好。
電動車龍頭Tesla隔晚公布業績,表現差過預期,盈利更大跌37%,股價盤後再挫逾4%,連同收市跌逾4%,差不多跌近一成,拖累電動車股下跌。小鵬(09868)跟蔚來(09866)齊齊跌逾8%,理想(02015)半日跌3.7%,噚日急升嘅比亞迪(01211)回吐2.7%,零跑(09863)跌1.2%算係跌得少。
港股弱勢未改,雖然阿爺多次出招,甚至出動國家隊入場,但都無補於事,主要係外資一去不復返,無資金入場點會升得起。另一方面,美債息高企, 中東局勢又未受控,種種因素均利淡股市,大市氣氛急轉直下。恒指失守10天及20天線,今日更跌穿上周初低位,睇嚟再下破前底17100機會甚大,下一個支持為萬七心理關口,但實際或要下試16500至16800方有較大支持。
麥狄文
(徐狄怡‧證監會持牌人)