美國私營企業職位增長數字遠遜預期，美債息從高位回順，美股周三好淡爭持，表現反覆，但最終三大指數倒升收市，道指升127點；標指反彈34點，仍未修復4300重要支持；納指反彈176點。VIX有所回落，但仍然喺17以上，美國仍有一定回吐壓力。至於港股連跌兩個交易日，恒指累跌613點並創今年新低後，今日隨外圍略為反彈，不過半日波幅僅得138點，加上成交額少得淒涼，只有266.97億元，反彈力度自然係有限公司。
恒指高開54點，升幅一度縮水至1點，見17197半日低位，接近日線保力加通道底部見支持，一度反彈140點，見17336半日高位。恒指半日升130點，報17326；國指升26點，報5933；恒科指收3797，升45點。
藍籌股普遍反彈，當中以百威(01876)半日升4.7%表現最好，而創科(00669)則跌1.5%，藍籌之中表現最差。重磅科網股全線反彈，不過最叻嘅京東(09618)半日都只彈2%，美團(03690)跟騰訊(00700)分別彈1%及1.8%；阿里(09988)僅彈0.6%。金融股之中，友邦(01299)半日升1.3%；平保(02318)跟港交所(00388)升不足1%，而三大內銀股升0.3%至0.7%不等，大笨象(00005)則持平。
市場憧憬港府撤辣招以穩住樓市，本地地產股今日全線向好，領展(00823)升0.8%算升得少，新世界(00017)連彈兩日，半日再彈2.5%；恒地(00012)跟新地(00016)分別升1.9%及1.3%。
電動車股今日反彈力度較佳，主要係電動車龍頭Tesla隔晚反彈6%，帶動「蔚小理」造好，小鵬(09868)半日升5.8%表現最好，理想(02015)跟蔚來(09866)分別升2.4%及3.9%。比亞迪(01211)彈1.3%算係彈得少，零跑(09863)升3.6%。
缺乏北水之下，港股半日成交額不足300億元，睇嚟噚日創下今年最低成交額之後，今日再縮水，沒有最低只有更低。港股目前處於本年低位，但仍未見資金入場趁低吸納，可見港股已徹底成為棄嬰。有消息指政府嘅工作小組，就打風繼續開市提交報告，並盡量提早交出計劃，若配合特首喺月底嘅施政報告，咁呢個計劃通過嘅可能性就愈高。
阿Man望一望今日個成交額，就算打風照開市，其實可以幫助到提高成交額??? 坊間已不止一次表示，希望政府減印花稅，以減低交易成本去刺激成交，一年打幾次風，多咗幾個交易日，會對提高總成交量有幫助??? 其實呢個所謂工作小組，搞咗幾個月就係研究咗呢個方法去激活港股成交??? 見到咁嘅情況，身為納稅人，每次收到稅單乖乖地喺稅季交稅嘅時候，有乜辦法唔情緒激動，想講十八個字粗口作為回應......
麥狄文
(徐狄怡‧證監會持牌人)
