美國8月職位空缺大幅回升至961萬份，10年息衝上4.81%，創16年高位，美股三大指數回落，道指跌430點，標指跌58點，失守4300重要支持，納指亦跌248點。VIX升穿19，恐慌情緒升溫，目前環球焦點均落喺10年債息身上。目前標指平均市盈率為24倍，回報率為4.16倍，低於10年債息4.81%，令美股短期下跌壓力增加。港股噚日跌近500點後，今早繼續走低，再跌至年內低位。
恒指低開64點，跌幅一度擴大至223點，跌穿噚日低位，見17107半日低位，更創超過十個月新低，其後跌勢喘定，總算守住17100水平。恒指半日報收17151，跌179點；國指跌80點，半日報收5869；恒科指半日跌65點，半日報收3752。半日成交額只有315.6億元，向好方面諗係沽壓唔算大，但實際上係水盡鵝飛，無人入場。
藍籌股之中，今日好少少，除咗友邦(01299)半日逆市升1.2%之外，本地地產股今日逆市反彈，當中以新世界(00017)半日彈3%表現最好，仲成為今日藍籌冠軍，恒地(00012)跟新地(00016)半日分別升1.2%及2.2%；領展(00823)亦彈1.2%；長實(01113)半日則跌1%，而信置(00083)半日則持平。金融股個別發展，除咗友邦逆市升之外，建行(00939)半日亦彈0.2%，但平保(02318)續跌1.6%，港交所(00388)跌近1%，仲未識彈。
美債息高企，不利科網股表現，港股呢邊嘅重磅科網股全線向下，美團(03690)沒有最差，只有更差，聯合創辧人喺呢啲低水平都減持股份，拖累股價半日跌3.3%；騰訊(00700)300大關終失守，半日跌1.1%；阿里(09988)分拆菜鳥上市消息未能支撐股價，半日跌1.8%，80大關久守必失，持貨者要小心。京東(09618)再創上市後新低，半日跌近1%，百度(09888)半日跌逾4%，成為表現最差藍籌股。
話咗生科股難炒，早幾日係威係勢，又係撐唔到幾多日，今日整個板塊全線向下，就連計劃年內斥資10億元回購嘅中生製藥(01177)，半日仍要倒跌近2%；其他生科藥股，半日跌幅由0.4%至超過6%不等。除咗生科藥股表現較差外，綠能股沽壓沉重，龍源(00916)半日跌近4%；其他綠能股閒閒地跌0.5%以上，中國高速傳動(00658)半日更急跌逾一成。
面對利率高企，美元匯價強勁，新興市場表現本來就強差人意，而港股更加係今年全球股市之中，表現持續落後嘅股市，更加乏人問律。加上成交持續萎縮，港股陰乾式向下，以一浪低於一浪嘅走勢，持續向下噚底。恒指噚日回補去年11月29日裂口17300水平後，未見反彈再度向下，短期將考驗萬七心理關口，而去年11月低位16800將會係較大支持。
麥狄文
(徐狄怡‧證監會持牌人)
