除咗聯儲局口吻近日鷹到爆之外，就連市場都開始相信美國息口仍未見頂，細摩CEO話美息要升至7%先到頂，嚇到隔晚美股啲銀行股散晒，再加上市場憂慮兩黨未就新財案達成共識，美國政府停擺，隔晚美股三大指數顯著下跌。不過人民幣並未有進一步向下，目前喺7.3水平靠穩，港股兩日跌近600點後，今日上半場反彈。
恒指高開5點，開市價17472已經係半日低位，其後反彈拾級而上，最多升188點，見17655，但未見資金追入，升幅略為收窄。中午恒指收報17577，反彈111點；國指收6072，升42點；恒科指彈21點，報3838。港股半日成交401.48億元，維持淡靜。
阿里巴巴(09988)計劃分拆菜鳥上市，半日升0.8%，其實有關阿里6+1計劃都講咗半年，即使落實分拆上市，市場早已消化相關消息，股價唔會受太大刺激，只係跟返個市上落。騰訊(00700)半日彈0.6%；京東(09618)屢創上市新低後，今日總算彈一彈，升1.2%，百度(09888)亦彈1%。小米(01810)半日升2%，相對其他重磅科網股，小米已算係本輪跌浪當中跌得少。美團(03690)逆市跌1.2%，今日都未肯反彈。
雖然隔晚美股嘅銀行股跌到一仆一碌，但今日港股呢邊嘅金融股全線造好，內銀股以招行(03968)半日升2.8%最勁，其他內銀股都錄得1%左右升幅。港交所(00388)半日彈1.1%，但股價未重上300元水平，弱勢持續。友邦(01299)跟大笨象(00005)半日分別升0.4%及0.5%，平保(02318)升0.6%。
今日半場以生科股表現最為突出，聯邦制藥(03933)創新藥UBT251獲美國FDA臨床試驗批准，半日升7.1%，其他生科股亦見資金追捧，普遍錄得4%以上升幅，藥明生物(02269)半日升半成，藍籌之中跑第一；同系藥明康德(02359)更升7.8%。
有消息指恒大(03333)主席許家印於內地接受監視居住，股價早段反彈升逾7%，其後半日升幅收窄至1.3%，但恒大物業(06666)及恒大汽車(00708)分別跌5.8%及4.3%。今日又有內房及其物管股復牌，旭輝(00884)與旭輝永升服務(01995)復牌後難逃插水命運，股價半日雙雙跌逾五成。美元強勢，拖累金價失守1900美元，金礦股應聲向下，紫金(02899)跌1.1%，山東黃金(01787)亦跌1.6%，招金(01818)半日跌0.2%算跌得少。
港股喺缺乏成交支持下，易跌難升，上周五挾淡倉下嘅升幅，兩個交易日就打回原形，雖然今日反彈，未見成交有所增加，斷估反彈亦唔持久。偶有反彈都只係挾淡倉，一旦再次跌穿17500已經連守三次嘅底部，除咗要回補去年11月裂口17300水平，睇怕連萬七關亦難保，暫時17500關不容有失，否則跌勢定必持續，繼續向下尋底。
麥狄文
(徐狄怡‧證監會持牌人)
