聯儲局隔晚議息維持利率不變，不過就大降明年減息預期，由6月時預計減1%下調至減0.5%，留意聯儲局言論係繼續放鷹，因為要持續打擊通帳，聲明暗示今年仍有機會加息一次，至少明年減息幅度，由6月預估減四次變成兩次，美股先高後低。道指跌76點，標指跌41點，納指跌209點，跌幅較為顯著。由於明年減息預期縮水，不利以融資發展業務嘅科技股，利率高企下自然跌幅較大。港股未能重返萬八關，今日沽壓增加，半日跌逾200點，再見一個月低位。
恒指低開89點，其後跌幅擴大至247點，見17638的半日低位，亦創近一個月新低。中午恒指收報17651，跌234點；國指跌85點，報6096；恒科指跌84點，收3837。半日成交額423.26億元，上日略增。
隔晚美股科技股沽壓嚴重，拖累港股呢邊嘅科技股插水，ATMJB無一倖免，騰訊(00700)跟阿里(09988)半日齊跌2.1%；京東(09618)再創上市新低，跟百度(09888)雙雙跌逾1%；美團(03690)半日跌近3%，小米(01810)跌1.5%，加埋攜程(09961)跌0.4%，合共已拖低恒指逾百點。金融股偏軟，強如大笨象(00005)半日要跌0.5%，其他內銀股跌0.2%，友邦(01299)跌1.3%；平保(02318)亦跌1.8%，港交所(00388)跌0.3%，算係跌得少。
其他藍籌表現亦麻麻，只有五隻股份逆市上升，新奧能源(02688)再度成為表現最好藍籌股，半日升1.5%，已經八連升。但舜宇(02382)再穿底，半日跌近4%，整個手設股板塊表現強差人意，閒閒地跌3%以上，其中信利(00732)半日更急跌13%。內需股表現亦唔多掂，啤酒股跟體品股跌幅全部超過2%。
不過內地電訊股叫頂得吓，除咗聯通(00762)升少過1%之外，其餘全部升1%以上。內房股今日亦唔錯，廣州放寬外地人購房條件，不過升幅當然唔算厲害，恒大(03333)半日升一成，又係愈垃圾愈要炒。其實內地一再放寬限購條件又如何，當投資者睇唔到內地房產市場嘅投資前景，仲點會肯投入資金，內房企業能否捱得過債務危機仍成疑問。
由於高息或持續一段較長時間，當美債回報有4%以上，股市投資回報變得唔太吸引。港股噚日成交額只有700億元左右，明顯資金唔願意投入股市，即使港股估值再低，但前景模糊，內地及香港經濟復甦進度未如理想，喺經濟前景欠佳下，再平嘅估值亦乏人問津，港股只有拾級而下，陰乾式繼續向下尋底。下一支持為前低位，約17500水平，此關再失，定必再見年內低位，之前見港股反彈，大膽假設港股已見底嘅所謂專家，恐怕又再一次跌碎眼鏡。
麥狄文
(徐狄怡‧證監會持牌人)
