隔晚美股再升，標指早前回試4300水平搵到支持，市場氣氛改善，標指重上4400水平暫靠穩，隔晚再升27點；道指則升213點，納指更回升114點。VIX稍見17危險警界線再度回落，重返15水平，市場未見恐慌，回調時成交亦縮減，反映持貨者惜貨如金，市場繼續逢回調吸納。留意呢個星期將公布大小非農數據，以及周五公布PCE數據，即使呢啲數據較預期強勁，但鮑爺一直保持較鷹嘅口吻，市場都已消化今年餘下時間或再加息一次。
至於港股噚晚亦跟隨美股造好，今早恒指高開130點，早段升幅曾收窄至109點，見18239半日低位，但內地有官媒稱降準或加快提上日程，市場憧憬中央加快救市，半日最多升408點，見18539高位，但尚未能挑戰20天線(18640)已回頭，半日升幅收窄至365點，恒指中午收報18496；國指半日升141點，報6387；恒科指收4235，升107點。半日成交額只有508.62億元，以半日嘅升幅嚟計，咁嘅成交額遠遠未能配合升幅。
藍籌股幾乎全線向好，大笨象(00005)半日升0.8%，友邦(01299)衰咗一排，今日總算重上70元水平，半日升近3%，表現唔錯。港交所(00388)亦重上300元大關，半日升逾4%，市場憧憬港府或跟隨內地減印花稅，以及考慮調整手數至一股以激活市場成交，港交所或有機擺脫之前弱勢，但港股能否從此救得返，都需要觀察一下。至於ATMJB則全線向上，除咗騰訊(00700)升1.6%之外，其他科網巨頭半日均升逾2%。內險及內銀股今日表現亦唔錯，內銀股升幅由1.7%至2.5%不等，平保(02318)跟國壽(02628)更分別升3.3%及2.8%。
內房物管股亦見反彈，不過阿Man對呢個板塊早就死咗心，睇見恒大(03333)兩日都插水，基本佢債可敵國嘅債務，係完全無法子搞得掂。至於其他內房股，捱得過債務危機能夠成功存活嘅，唔知淨得返幾多，當然有國企背景會好啲，民企就真係自己顧掂自己。阿爺目前對於內房嘅取態係以時間換取存活率，底線係內房能夠還得起利息畀銀行，唔可以拖累任何銀行，尤其係國有銀行，總之目的係保住銀行唔好出現大量呆壞帳，唔可以動搖到銀行體系。咁嘅情景下，內房都係繼續唔生唔死，既然係咁，不如睇少一個板塊算。
目前大市處於跌浪反彈之中，能否扭轉跌勢，再組織升浪，仍有待觀察，始終成交未成氣候，單靠消息係唔足以扭轉個長期弱勢，無資金流入嘅市場，反彈亦只係短暫。
麥狄文
(徐狄怡‧證監會持牌人)
