美國PPI有回升之勢，市場憂慮息口持續高企，美匯指數走強，一度升穿103超過一個月高位，拖累人民幣走弱，離岸價曾跌逾200點子，目前正處於7.27水平，拖累港股今早曾跌逾500點，半日顯著跌穿萬九大關。
恒指裂口低開377點，甫開市已失守萬九大關，其他跌幅略為收窄至323點，見18751半日高位，但沽壓持續，跌勢再加劇，半日最多跌520點，見18554半日低位，但未下破7月底位19279，但接近7月24日低位18562。半日恒指跌459點，報收18616；國指半日跌194點，報收6356；納指則跌130點，報收4141。半日成交額577.13億元，咁跌去但半日成交無縮水，反映沽壓都唔細。
藍籌股全線向下，金融股走軟，內銀跟內險股沽壓較大，平保(02318)跌4.7%，其他內銀跟內險股閒閒地跌1%或以上。至於大笨象(00005)半日跌1%，友邦(01299)半日跌1.3%；港交所(00388)終於失守20日線，310守咗幾日都係頂唔住。至於ATMJB全線「跪低」，騰訊(00700)半日跌1.3%，算跌得少，美團(03690)、百度(09888)跟阿里(09988)半日跌逾3%，京東(09618)半日則跌近3%。
汽車股今日同樣捱沽，新能源汽車減價戰未有停落嚟，Tesla中國宣布，今日起下調MODEL Y長續航及高性能版售價。汽車股全線向下，比亞迪(01211)之前頂咗咁耐，今日追返跌幅，半日大跌7.5%；理想汽車(02015)跌 3.7%；小鵬(09868)跌6.2%；蔚來(09866)跌3.9%；零跑汽車(09863)亦跌6.1%；其他傳統汽車股均跌3%以上。
人民幣走弱就係不利內房股，但內房股本身都係弱，本來上周五有消息指，阿爺擬推1萬億地方再融資債額度，主要是為防止地方債崩潰，點知轉個頭，碧桂園(02007)旗下11隻境內債券由今日(14日)開巿起停牌，估計都係要同債主講數，股價半日重挫16.3%，藍籌股中表現最差；同系碧服(06098)亦跌近一成。其他內房股，少則跌2%；重則跌一成以上。
阿Man都講咗N咁多次，內房股不宜沾手，有波幅，冇升幅，依家搞搞下係沒有再差，只有更差，不斷爆雷，拖死晒整個經濟。
麥狄文
(徐狄怡‧證監會持牌人)
