隔晚美股個別發展，剛公布嘅美企業績表現參差，Tesla及亞馬遜收市跌2.4%和1.5%。銀行股有沽壓，花旗及富國銀行收市跌超過1%；地區銀行KeyCorp及US Metro Bancorp收市挫2.6%及1.4%，三大指數升跌不一，道指升71點，但標指跟納指分別跌12點及62點。不過市場已認定聯儲局7月加息0.25%後，有機會係今次加息周期最後一次加息，今年餘下時間議息時，息口料持平，即美息有望見頂，整體氣氛嚟講仍然唔錯，美股暫時高居不下，高位整固。但係噚日港股就喺夜期跟ADR回軟，今早大市低開。
除咗隔晚夜期跟ADR已腳軟，惠譽將美國政府的信貸評級下調至「AA+」，因為預計未來三年美國的財政狀況將惡化，道指期貨跌逾百點，港股半場更曾跌逾400點。恒指低開108點，報19902，跌幅一度收窄至30點，見半日高位19981，其後跌勢加劇，最多跌452點，見19558點半日低位，但100天線(19553)叫做有啲支持。半日恒指收報19613，跌397點；國指跌146點，報6707；恒科指跌116點，收4422。
半日成交額598.53億元，樂觀啲睇，跌市成交減少，沽壓唔算大，不過阿Man就咁睇，上周港股急升，成交大增，但之前大市低位徘徊，成交卻愈玩愈縮，低位未見有資金收集，高位先嚟大成交?? 莫非大戶後知後覺，到個市由18000水平反彈二千點先嚟追貨，幫你啲散戶接返啲返家鄉嘅貨，係咪真係有咁好心。抑或係大市彈上嚟，大戶趁機再度派貨畀散戶，又或者係公司乘機喺市場抽水集資，雅居樂(03383)噚日就大折讓配股集資，配股折讓幾多，噚日就一嘢跌返咁多，早兩日多手買內房嘅缸邊友，咁又無啦啦畀呢啲配股活動過咗一棟。
藍籌股今日逆市上升嘅股份寥寥可數，只有東方海外(00316)半日升0.3%，創科(00669)半日升1.4%，以及一對孖寶碧桂園(02007)及碧服(06098)急升。碧桂園孖寶不僅取消咗配股，碧服更表示有意喺公開市場回購不多於一成已發行股份，股價半日急升近18%，並帶動碧桂園半日升2%。
其他藍籌股全線向下，科網股回吐，美團(03690)半日跌4%；百度(09888)跌3.5%；騰訊跌(00700)半日跌近3%，京東(09618)跟網易(09999)齊齊跌逾2%；攜程(09961)跟阿里(09988)半日跌逾1%，呢一堆科網股已拖低恒指超過150點，相當於近四成大市跌幅。
金融股同樣腳軟，大笨象(00005)交出一份理想業績，但今日股價回吐近1%，難敵大市跌勢，同系恒生(00011)嘅成績表平平無奇，半日再跌4.6%。其他內銀跟內險股全線向下，跌幅由超過1%至2%不等。港交所(00388)半日則跌2.3%，320元或成為短線阻力位。雖然相對美國嘅生科藥股，港股呢邊嘅生科藥股估值唔算貴，但股價走勢日升日跌難捉摸，早兩日係威係勢，今日又全線下跌超過3%，跌逾半成者比比皆是。
港股早兩日雖再升，但兩日開出陰燭高開低收，日線圖都預咗要向下補裂口，今日完全回補7月28日嘅19900裂口，回補呢個裂口而又未能重返20000大關以及上周四高位19685及上周五高位19940，再失守100天線19553，短線或繼續向下再回補7月26日裂口19404，及考驗10天線及250天線。一旦失守，20天線及50天線19173為好友最後一道防線。準備撐開嘅日線保力加道通頂部20172為短線阻力，未能重返此水平再撐開通道，港股仍然走唔出上落市格局。
麥狄文
(徐狄怡‧證監會持牌人)
