雖然隔晚反映中概股嘅金龍指數回軟，夜期跟ADR回落超過300點，但今早人民幣回勇，港股喺期指結算日先跌後回升，半日倒升175點，恒科指更升逾2%。恒指低開220點，早段一度跌257點，見19381半日低位，其後止跌回升，最多升194點，見19834半日高位。中午恒指報收19814，升175點，國指升100點，報收6772；恒科指半日報升4434，93點。半日成交額632.87億，話多唔算多，但比近日半日平均成交額又唔算少。
藍籌股幾乎全面做好，只有大笨象(00005)因為已完成20億元回購計劃，半日跌1.2%；但友邦(01299)跟港交所(00388)半日做好，分別升1.2%及1.3%。至於其他金融股內銀跟內險股半日普遍做好，招行(03968)半日更升逾2%。至於科網股今日勢頭轉強，中國政府傳要求騰訊(00700)等提交初創投資成功案例，ATMJB全線向上，只有阿里(09988)升不足1%，美團(03690)半日倒升2.6%；騰訊、京東(09619)及百度(09888)半日升逾1%。
人仔走強，內房跟物管股日回升，住建部籲續鞏固樓市企穩回升態勢，雖然得把口講，但打嘴炮一樣帶動兩個板塊上升，當中龍湖(00960)半日升7.3%，為表現最好藍籌股，其他內房物管股閒閒地升超過2%。
內地手機銷量跌幅顯著收窄，之前表現疲弱嘅手機設備股終見似樣啲嘅反彈，舜宇(02382)半日升6.5%，有貨嘅好趁反彈走人，現價估值去到30倍，同蘋果公司相約，若然睇好手機股，不如真接買蘋果(AAPL)。其他手設股乘機炒上，瑞聲(02018)跟丘鈦(01478)半日升逾4%；比亞迪電子(00285)跟高偉電子(01415)齊齊升超過3%。
恒大汽車(00708)公布業績後，成功復牌，公司已經資不抵債，兼且被核數師懷疑無法持續經營，交易所都批准復牌，算唔算為小股東打開逃生之門，拎返啲渣好過母公司恒大(03333)一直未能復牌連渣都無。半日股價急跌六成，不過開市價1.01係接近全日低位1元，只係轉頭已上咗1.4元之上，忍唔到手追貨博反彈，結果都係得個桔，即日追貨博反彈暫時輸一成，但停牌前持貨，今日埋單至少唔見一半。
港股暫時已企穩多條移動平均線之上，加上初步突破下降軌，有條件進一步挑戰6月高位20100水平，短期若超買出現回吐整固，19300至19500有不俗支持，若然失守19300即重返250日線之下，小心又再次掉頭，畢竟港股仍然未走出大型上落區間。
麥狄文
(徐狄怡‧證監會持牌人)
