美國聯儲局議息前，消費者信心指數升至兩年高位，令市場對美國經濟軟著陸信心加強，美股喺議息前靠穩，三大指數仍錄得升幅。而納指調整權重股比重，呢兩日亦未見對美股造成影響。
正值美股業績期，唔少企業公布業績前，已見資金偷步買貨，公布業績後股價反而下跌，Tesla嘅走勢就相當明顯。剛剛公布業績嘅通用汽車，營收及盈利均優於預期，並調升全年預測，但股價低開5%，幸而低位有買盤吸納，收市跌幅收窄至3.5%。另通用電氣股價表現氣勢如虹，資金輪動情況都幾明顯，由高科技股流向傳統股。
至於港股，噚日急升逾700點後，市場觀望美國聯儲局今晚議息，大市見回吐，恒指早段曾跌近200點，暫失守250天線(19325)。恒指低開93點，跌幅一度收窄至29點，見19404半日高位，但未能企穩19400水平，跌勢再現，半日跌穿埋250天線，最多跌188點，見19245半日低位。中午恒指收報19280，跌154點；國指跌78點，報6525；恒科指跌58點，收4198。半日成交額只有445.68億元，向好嗰方面諗，回吐壓力唔大。
藍籌股個別發展，早段大笨象(00005)靠穩微升，但中午收市倒跌0.1%；友邦(01299)跟港交所(00388)半日齊齊跌1%，平保(02318)亦跌1.2%，其他內銀及內險股偏軟。至於科網股半日表現亦唔好得去邊，美團(03690)半日跌0.5%算硬淨，騰訊(00700)、百度(09888)跟阿里(09988)則跌逾1%，京東(09618)更跌逾2%，只有網易(09999)逆市升1%。創科(00669)最大嘅客家得寶（Home Depot）隔晚股價創超過五個月高位，刺激創科股價逆市造好，半日升2.5%，藍籌股中表現最好。
政治局會議未有再提「房住不炒」，阿爺仲話要優化房屋政策，內房跟物管股昨日升勢顯著，但急升過後難免回吐，當中碧服(06098)噚日勁彈逾兩成後，今早回吐6.4%，雖然藍籌之中表現最差，但相對噚日升幅，今日咁嘅回吐幅度都算係唔太差。其他內房及內險股均見回吐，但跌幅由不足1%至3%之內，都算係靠穩。至於唔再提「房住不炒」後，內房企業銷售能否回升，都需要一段時間觀察，講真面對人口老化，出生率下降，人口負增長同時，空置房數字卻未能下跌，就算唔再打擊炒樓，內地樓市短期都好難炒得起。
生科股逆市上升，但呢個板塊升升跌跌，都如大市一樣難以捉摸，日升日跌，股價上落全由大戶操控，傻戶只有傻眼被割韭菜嘅資格，要喺上上落落中搭上大戶順風車難過登天，呢個亦係噚日急升後，今日回吐亦唔見有人肯入場，成交再度萎縮嘅主要原因。港股已經變到升市無人追，跌市無人隊，完全係一個被遺棄嘅市場。
麥狄文
(徐狄怡‧證監會持牌人)
