美股喺CPI公布前夕，以及第二季度業績期展開前造好，隔晚三大指數回升。隔晚夜期跟ADR都跟隨美股回升，今日再借人民幣反彈，離岸價轉強至7.21水平之下，創近三星期高位之勢，港股一度升逾300點。
恒指高開191點，升幅一度收窄至93點，見19573半日低位，其後A股喺人仔走強下愈戰愈勇，港股再回復升勢，半日最多升324點，見18803高位。恒指中午收報18761，升282點；國指升94點，報6329；恒科指升81點，收4026，重返4000大關。半日成交額只有429.14億元，繼續呆滯，成交最多係盈富基金(02800)，睇嚟又係北水做嘅好事。
恒科指重上4000大關，科網股普遍造好，ATMJX全線向上，阿里(09988)、騰訊(00700)跟美團(03690)齊齊升逾1%，京東(09618)跟百度(09888)半日更升逾2%，就連小米(01810)亦升2.6%。除咗科網股外，今日藍籌股都普遍造好，金融股合力支撐大市，友邦(01299)半日升2.2%，大笨象(00005)升0.7%，內險股升幅普遍超過1%，至於早兩日被大行唱淡嘅內銀股，獲內地官媒護航，指外資或錯誤解讀內銀財報，內銀股今日亦隨大市造好。
人行延長支持房地產市場政策至年底，內房股雖普遍造好，但升幅有限，本身板塊內股份積弱，上面蟹貨一層又一層，邊有咁容易翻身。
雖然有內地汽車企業破產，但無礙強勢嘅汽車股今日跟隨大市向上，至重磅嘅比亞迪(01211)都升2.5%；汽車三傻，理想汽車(02015)升，小鵬(09868)升7.6%，蔚萊(09866)更升逾一成。澳門機場第二季旅客量增長逾五成，濠賭股造好，整個板塊普遍錄得3%或以上升幅。
港股借人民幣反彈造好，今日若能企穩18800水平，或有望向上收復10天線(18899)，暫時守咗上周低位，港股又未至於太差。只係仍處於多條移動平均線之下，弱勢暫未能扭轉，即使向上逐條平均線收復，喺欠缺成交配合下，可能去到19400，即250天線附近又掉頭。暫時恒指喺18400至19400的千點內窄幅上落，上下均未見突破，只宜短線操作炒上落。
