隔晚美股獨立日假期前只有半日市，今晚假期休市，假日前美股仍造好，三大指數向上，主要係重磅股Tesla急升，帶動氣氛向好。不過假期前美股成交都係較淡靜，嚟緊今個星期四、五仲有大小非農數據公布，留意就業市場轉弱嘅同時，時薪增幅會否再升，薪金增長係通脹回升嘅威脅。
至於港股噚日下半年開局已有理想表現，隔晚雖然夜期有啲回吐，今日恒指略為低開17點，一度跌53點，見19253半日低位，但金龍指數隔晚維持升幅，港股喺一眾科網股帶動下重上20天線，最多升142點，見19449半日高位；其後回順，但仍穩守於20天線之上，半日仍錄得過百點升幅。恒指半日收報19412，升106點；國指報6624，升34點；恒科指收4091，升29點。不過成交低迷已成新常態，半日成交額只有390.74億元，噚日大市升逾三百點，全日成交額不足900億元，估計今日成交額都唔會有太大突破。
藍籌股普遍向上，ATMJB全線上升，京東(09618)跟百度(09888)繼續跑出，半日升逾2%，美團(03690)升1.5%。騰訊(00700)跟阿里(09988)半日分別升0.4%及0.3%，相對落後，大市要挑戰50天及250天線，可能要靠呢兩大巨頭發大。網易(09999)創52周高位，半日升逾1%。大笨象(00005)半日升0.4%，同樣創52周高；友邦(01299)半日升0.5%，企穩80水平之上。除咗科網股之外，今日生科股普遍亦有理想表現，上半場普遍向上。手機設備股亦造好，舜宇(02382)跟瑞聲(02018)分別升2.2%及3.1%，小米(01810)半日升1.8%，其他手設股升2%或以上。
雖然人民幣開始喘定，但內房股卻逆市走弱，全線向下，個別股份如雅居樂(03383)跟融創(01918)更跌逾2%。內房內傷嚴重，上半年銷售未見起色，暫時神仙難救，人民幣疲弱，整個板塊跟住插水，但人仔回升，亦唔見得內房有特別好表現，行兩步退三步，一直落後大市。房產市道麻麻，連帶水泥股都逆市下跌，整個板塊走軟，跌幅由0.8%至1.8%不等。
暫時大市已成功企穩10天線(19136)及20天線(19326)，只要呢兩條線守穩，有望進一步挑戰50天線(19438)及250天線(19463)匯聚區，但19500阻力唔細，要進一步突破向上，可能要靠耶媽訪華有否利好消息刺激，至於上月未能突破嘅100天線(19861)，或會成為本輪反彈浪頂。7月份港股唔排除先升後回，短線支持為18800，失守多條平均線後未能守住18800，港股或再度向下尋底，所以唔好太老定5月嘅18000水平，就係今年港股嘅底部。
麥狄文
(徐狄怡‧證監會持牌人)
