美股隔晩個別發展，雖然鮑爺放鷹，指美國今年會再加息兩次，減息無望，但美股算硬淨，係VIX指數仍然處於低水平下，於高位整固，仍未見有較大調整勢頭出現。至於港股喺期指結算日走軟，鮑爺放鷹令美元強勢持續，離岸人民幣創七個半月低位，拖累港股反彈兩日後再回軟。
恒指高開8點，見19180已經係半日高位，甫開市已掉頭向下，未幾失守萬九關，跌幅擴大至超過300點，見18870半日低位，中午更以此收市，跌301點。國指跌109點，報6411；恒科指跌75點，報3926，再失四千大關。半日成交額406.79億元，其實成交額報唔報都無乜所謂，低成交已變新常態，更有口痕友笑言，珍惜金錢，遠離港股。港股缸邊友都心灰意冷，成交萎縮亦屬正常。
藍籌股只有6股逆市上升，其他全報仆直，科網股以京東(09618)跟百度(09888)半日跌逾3%較弱；阿里(09988)畀埋部份業務嘅分拆時間表，一樣炒唔起，股價半日跌2.6%，能夠守喺80元水平之上，全靠一班die hard粉絲。其實阿Man好早之前已講過，阿里估值係相對以前平咗好多，但平咗好多股價都無乜表現，原因係基本因素已改變，今日嘅所謂低估值，實際上又唔算太低，即使軟銀已盡沽其持股，解除咗減持嘅不明朗因素。但軟銀沽貨以嚟，一直係透過市場減持，即係未有大大手嘅配股畀機構投資者，代表阿里貨源已沽到散晒，無大孖沙鎮場，情況一如美團(03690)被騰訊(00700)以贈品送予股東，貨源唔再歸邊，自然易跌難升。美團半日亦跌2.8%，騰訊跟網易(09999)跌0.7%已經算有交代。
金融股普遍下跌，港交所(00388)半日跌1.3%，300元大關失守都係難睇。大笨象(00005)半日跌1%，友邦(01299)逆市升0.3%，但80元始終企唔穩。其他內銀跟內險股普遍向下，但跌幅少於1%，以人仔目前咁弱勢，內地金融股嘅跌勢已算溫和。
人仔咁低迷，內房物管股又隊返轉頭，話咗呢兩個板塊無得搞，碧服(06098)半日跌5.5%，藍籌之中跑第尾；碧桂園(02007)唔好得去邊，半日跌4.8%，齊齊排喺藍籌股隊尾。至於其他內房跟物管股，至少跌1%或以上。內房債務問題衍生出更多經濟問題，房地產市場未能再帶嚟財富效應，內地一直強調靠內需，靠內循環呢招亦行唔通，內需消費股受壓，相關份閒閒地跌2%或以上。
港股完成由18000反彈至20000嘅使命後，又再回復跌勢，重返多條移動平均線之下，今日期指結算，都唔等埋明日半年結，淡友已急不及待出招，萬九水平失守，一旦再跌穿18800及18500，5月份低位18000水平大有機會下破。之前坊間見6月初反彈，唔少聲音指18000應為今年低位，但阿Man未有咁肯定，尤其係自1月高位展開跌浪以嚟，反彈一浪低於一浪，中線弱勢未改，萬八係咪今年底部，似乎未可以太過肯定。
麥狄文
(徐狄怡‧證監會持牌人)
