隔晚美股休市，布林肯會見習主席後，雙方未見有發表聯合壣聲明，中美關係雖打破僵局，但實際未見有太大轉變。內地下調6月貸款市場報價利率(LPR)，離岸人民幣再急跌，下調利率原意係想令銀根鬆一啲，加強市場流動性，可惜換來係人民幣繼續走弱，咁內地企業收益係以人仔計算，加埋資產貶值，其實減息都唔係一定有着數。
恒指低開49點，見19863已經係半日高位，大市隨住人民幣一齊下跌，最多跌326點，見19586半日低位，並跌穿50天線(19684)。恒指半日跌303點，報收19609；國指跌131點，報6645；恒科指收4071，跌104點。半日成交額435.01億元，又回復淡靜。
藍籌股普遍受壓，ATMJ全線向下，內地有傳媒報道，張勇將不再擔任阿里巴巴(09988)董事會主席兼首席執行官，馬雲退場，依家連張勇都走埋，巴巴無咗呢兩個舵手，以後唔知會點樣，半日股價跌1.6%。今次張勇唔做阿里CEO，市場反應都唔算大，主要係集團解釋咗，張勇專注於阿里雲智能集團嘅工作，咁阿里呢邊業務發展較為成熟，交棒畀下一位亦係正常，不過美團(03690)跟京東(09618)半日跌逾3%，騰訊(00700)半日亦跌2%。
大笨象(00005)跟友邦(01299)噚日撐住個市，今日都要跟市跌，不過前者跌0.2%，仍然企硬喺60元水平，創完52周高暫時回吐壓力唔算大；友邦半日則跌1%。人民幣雙櫃枱交易，雷聲大，雨點小，港股成交仍然呆滯，港交所(00388)半日跌2%，又重返310元水平之下。
人民幣腳軟，對人仔走勢極為敏感嘅內房股全部跌到一仆一碌，阿Man都講咗N咁多次，內房股無運行，唔係馬後炮，就算短線反彈，只要人民幣一腳軟，定必打回原形，甚至愈跌愈多。碧桂園(02007)半日跌5.7%，藍籌之中包尾；其他內房股閒閒地跌2%以上，合景奉富(01813)更跌近一成。物管股亦跟跌，碧桂園服務(06098)半日跌5.5%，緊隨碧桂園齊齊墮落為包尾藍籌，其他物管股至少都跌2%以上。
減息本來對融資需求高，又無盈利嘅生科股唔係壞事，偏偏生科股今日跌到走晒樣，本來呢個板塊係本輪反彈浪中表現都係落後過人，今日大部份生科股都插水，跌幅由3%至超過半成不等。不過雲頂新耀(01952)據報旗下腎病藥物耐賦康，預計將於四季度獲批，半日急升29.1%。
恒指今日跌穿咗50天線，若然連250天線(19549)跟10天線(19563)同告失守，本輪反彈浪可以話正式玩完，不過暫時上半場呢兩條線仲係守住，加上真係跌穿都未必係一日嘅事，暫時尚待觀察，但係呢幾條線失守又上唔返20000大關，港股都係未能扭轉由1月延伸至今嘅跌勢，更莫講話轉返入牛市。
麥狄文
(徐狄怡‧證監會持牌人)
