熱門:

2023年5月19日 港股直擊 即巿股評

【盤房來料】港股浪低於浪續向下尋底

雖然隔晚美股表現唔錯,喺美國債務上限問題快解決嘅情況下,市場氣氛向好,三大指數高收,但反映中概股表現嘅金龍中國指數唔精神,阿里(09988)跟拼多多等電商股顯著下跌,拖累指數跌3.5%。加上人民幣離岸價創五個半月低位,兌美元一度跌穿7.07,拖累中港月股市低開,恒指一度跌逾300點,創兩個月低位。不過喺A股拗腰回升下,港股跌幅收窄,半日仍跌逾百點,再度失守250日線(19699)。

恒指低開191點,其後跌幅擴大至最多跌374點,見19352半日低位,創近兩個月低位。其後A股由跌轉升,恒指跌幅跟住收窄至116點,見19610半日高位。中午恒指跌188點,報19538;國指跌86點,報收6628;恒科指跌71點,報收3846。半日成交額506.89億元,大市下跌至19500水平仍未見資金肯入場,睇嚟港股繼續無運行。

藍籌股個別發展,科網月股普遍下跌,阿里巴巴(09988)業績麻麻,季度收入差過市場預期,隔晚喺美股已率先插水,今日跌5.1%,都係跟返隔晚跌幅,成為半日表現最差藍籌股。至於公布業績前炒上,績後插水嘅騰訊(00700)今日續跌,半日再跌1%,暫時叫守到330支持位。不過中移動(00941)逆市升1.8%,算係幫個市撐住19400-19500呢啲支持位嘅功臣;友邦(01299)跟大笨象(00005)半日微升,唔係靠呢三隻重磅股撐住,睇怕個市連1月份低位亦不保。

內房股跟物管股何止係有波幅,冇升幅,呢期係每況愈下,碧桂園(02007)半日跌3.7%,創超過半年低位,噚日就龍湖(00960)成為半日表現最差藍籌,今日就碧桂園半月年低位,內房股叫股東情何以堪,持有呢個板塊,除咗失望就只有失望。

依家幾大重磅科網股,就只剩低美團(03690)仲未公布業績,之前百度(09888)跟京東(09618)公布完業績,即使業績平平,股價仍績後做好,令唔少資金喺騰訊(00700)跟阿里公布業績前偷步炒上。結果騰訊跟阿里業績後,跌到一仆一碌,唔少追貨嘅散戶,又慘被割韭菜。其實中概股自從去年出現咗監管風暴後,外資對於中概股早已心灰意冷,阿爺嘅政策完全唔利好科企未來發展,而且政策朝令夕改更令外資卻步。如今只剩下中港資金自顧自買貨,子彈有限,一旦股價上升,又遭外資股東連環減持,基本上港股咁嘅狀況下,實在無資金願意同你坐定定中長線投資。目前喺市內嘅資金,以打游擊為主,令港股出現日升日跌嘅狀況,但值得留意係,呢個幾星期,港股嘅走勢係一浪低於一浪,失守全部移動平均線,加上無資金肯入場低吸,睇嚟1 月份嘅低位隨時不保,低處未算低。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads