隔晚美股馬丁路德金日假期休市，歐洲股市則溫和造好，港股則無太大方向，經過四個交易日再累漲逾400點後，今日偏軟。恒指低開68點後，一度回升50點，見21797半日高位後掉頭向下，雖然內地公布多項經濟數據優於市場預期，一度帶動跌幅再度收窄至80點，但其後沽壓增加，半日最多跌253點，見21493半日低位。中午恒指收報21527，跌219點；國指跌56點，報7294；恒科指則跌29點，報4477。半日成交額只有667.32億元，預期逼近農曆年長假，成交只會買少見少。
藍籌股今日偏軟，重磅科網股全線向下，只有阿里巴巴(09988)半日仍保住0.4%升幅，騰訊(00700)早段仲頂得住，但至中午亦要跌0.8%。京東(09618)跟美團(03690)半日分別跌2.9%及1%。另網易(09999)跟百度(09888)半日分別跌1.7%及2.7%。至於噚日表現唔錯嘅金融股，今日普遍腳軟，國壽(02628)半日跌3.5%，友邦(01299)跟平保(02318)半日齊齊跌逾2%。港交所(00388)繼續下沉，半日跌1.7%。大笨象(00005)經過多個裂口上升多日，超買情況嚴重，今日回頭都合理，但以跌幅嚟計，今日回吐壓力唔算大。舜宇(02382)重返紅底股，半日再升2.8%，係表現最好藍籌股。
要數表現比較差嘅板塊，一定係生化股，龍頭藥明生物(02269)見主要股東配股減持，拖累生物科技股指數半日回吐3%，而藥明生物半日則跌逾半成，係表現最差藍籌股。雖然先聲藥業(02096)抗新冠創新藥新藥上市申請獲藥監局受理，股價半日跌逾一成，板塊內其他股份閒閒地跌半成以上。
講真仲有三個交易日就放農曆年長假，預期成交額呢幾日會愈玩愈縮水，暫時大市又未似會有較大幅度調整，只係喺高位震盪徘徊。不過呢個幾星期，唔少股仔落鑊，重磅股則停滯不前，出現劣幣驅逐良幣嘅狀況，就算個市仲未至於要急回，呢一輪升浪都已至尾聲，暫時大市喺二萬二水平阻力較大，不過只要回調仍守10天線(21347)之上，放完假返嚟仍有權再挾淡倉，並頂住個市呢個月喺接近高位結算。雖然唔少淡友都磨拳擦掌想開淡倉，但留意下周一至三放假，若然外圍玩突擊大幅向上，港股仍有條件再挑戰22000，呢幾日都係打游擊短炒算數，好倉或淡倉過假期都欠防守性，不如提早收爐。
麥狄文
(徐狄怡‧證監會持牌人)
