隔晚美股造好，雖然聯儲局官員日前再放鷹，但市場仍憧憬通脹受控，今年內有機會減息，三大指數向上，標指跟納指更升逾1%。夜期跟ADR隨美股造好，今早恒指高開163點，一度升至262點，見半日高位21698，再創六個月高位，但其後升勢逆轉，11點後轉升為跌，最多跌213點，見21223半日低位。中午前跌幅略為收窄，恒指半日跌70點，收報21365；國指跌39點，報7271；恒科指跌85點，報4461，跌幅達1.9%，跑輸大市。半日成交略增至936.75億元，嚟到呢啲位，自然有獲利沽盤食糊，成交大返啲都好正常。
藍籌股各走各路，內房物管股近日再現配股潮，雖然內地有政策想扶起內房，但內房債務問題，暫時治標未治本，內房自救下只有不斷喺市場配股集資，抽水已渡過財務難關，股價稍為有起色就不斷配股，市場自然想避開呢個板塊。碧服(06098)半日跌逾半成，藍籌之中跑第尾、龍湖(00960)跟碧桂園(02007)半日分別跌3.7%及2.4%。相反，本地地產股噚日逆市下跌後，今日又逆市反彈，新地(00016)回升2%，領展(00823)升2.5%，不過噚日跌得少嘅新世界(00017)今日跌2%，似乎係追返噚日嘅跌幅。
比亞迪(01211)呢期回勇，未有理會股神巴菲特繼續減持，股價今早一度升9%，但250天線236元有阻力，升幅收窄至不足6%，但仍然係半日最大升幅藍籌股。比亞迪雖然未重返250天線，但由200元樓下狂彈，都足以挾死淡友，不過既然250天線嘅阻力唔細，加上股神持續沽貨，嚟到呢度都應該差不多。即使比亞迪宣布計劃大舉擴張印度電動車市場，但要實現盈利都要時間，短線呢個消息消化後，股價應該放完煙花。
科技股係呢一輪大市升浪嘅火車頭，但今日都見腳軟，高位回落，強如阿里巴巴(09988)半日亦跌3.2%；騰訊(00700)高開低走，半日倒跌3.5%，目前險守360短線支持。美團(03690)跟京東(09618)呢期持續跑輸，美團半日跌2%，主要係受騰訊派美團股份作為特別股息有關，雖然要3月底先收到貨，但除淨過後已知幾時有貨收，唔少基金已偷步沽貨，令其股價近日表現較為疲弱。至於京東成為換馬對象，同屬電商股，唔少大行報告都建議沽出京東換入阿里，因為阿里估值更為便宜，令近期兩股出現此起彼落現象。其他科網股普遍下跌，跌幅閒閒地超過2%，當中明源雲(00909)更跌逾8%，成為表現最差嘅恒科指成份股。
隔晚紐約期油升3%至一周高位，高盛又唱好油市前景，三桶油全面上升，中石油(00857)半日升4.2%；中海油(00883)今年淨產量目標最多6.6億桶油當量，半日股價升2.2%，其他石油股及油服股亦跟升。
暫時港股仍然高位徘徊，長氣都係講呢句，21000樓上入場值博率唔高，風險相對喺20000樓下大增，若然相信今年個市有機會扭轉熊市入牛，都要搵一個更佳切入點，阿Man就畀少少耐性，等埋過年返嚟有冇回調，至少落返21000樓下再分段收集。
麥狄文
(徐狄怡‧證監會持牌人)
