全球股市今年表現差，主要股市中，近乎全線見紅，只有舊經濟股佔大多數的英國股市錄1.7%升幅，美股經過2018至2021年三年升市後，標指由今年初4818點見頂，之後一度插至3491點，深度達27.5%，以昨晚收市3849計，仍要大跌19.2%。
納指就更誇張，今年最高見過16513，10月13日最低則見過10440點，深度達36.8%，目前仍要重創33%。
恒指跌幅算比美股輕，執筆時造16895，即相當於今年要跌15%左右，但不幸是連跌三年，今年最低見過14597，即一度急瀉37.6%，科指執筆時造4166點，意味今年要跌26.5%。
企啱邊致勝關鍵
本欄算在今年執番身彩，在年初展望講座中一度睇好汽車零件及汽車晶片股，當中汽車零件因為受俄烏戰爭影響要止蝕，但汽車晶片股表現就絶不失禮。雖然中伏錯愛汽車零件股，但也令整個思維大方向轉軚，更在標指4700點附近由牛變熊睇淡大市，故今年不單未有損偒，更錄多唔錯豐厚回報一年。
常言道，股市喺戰場非善堂，贏家只有5%，更何況對手是基金經理以至主權基金，絶非我們呢類一般散戶，單是有Bloomberg資訊機及一大疊大行報告在手，對比散戶資訊已跑贏一大截，還未計從路邊社獲得枱底消息，故散戶絶對不要太尋迷圖表。當然圖表絶對喺有一定價值及作用，但大家要明白圖表背後喺國家及一間公司嘅基本因素與估值之寫照，故必需要扎扎實實研究背後相關重要理論。
雖然今年淡友大獲全勝，但重申一點，本欄絶非長期淡友，正如2019至2022年叫大家唔理好醜要掃發夢股、太陽能或電車新能源股，企啱邊喺相當重要，尤其是明年投資市場將會更CHOK，只要企啱邊市場一樣充滿機遇。
明年機會處處
首先全球維持加息，或者加多一兩次就完，但目前聯儲局仍努力縮表，變相衰退將近，通脹將會大幅下滑，風險資產市場(包括股市)上半年會維持弱勢，睇淡股市仍然喺最佳策略。
不過，息口若有望見頂，加上進入衰退，目前十年期美債飄近四厘，重返4.5厘樓上後，第一季便是買長債嘅好機會。
其次，美股一旦明年出現急跌，配合經濟衰退，聯儲局將會減息救市，始終2024年總統大選，2023下半年股市將重拾生氣，但緊記當第一次減息時切勿心急撈底，但當出現第二次減息時，就喺轉軚造好時機。
《孫子兵法·軍爭篇》有云「其疾如風，其徐如林，侵掠如火，不動如山，難知如陰，動如雷震」，所謂順逆有時，能否戰勝市場，在乎如何部署、心理質素、勇氣等考驗，新一年機會處處，要好好把握急跌後急彈嘅機會。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周五在「信報網站」及「港股360」撰文。
