熱門:

2022年12月1日 港股直擊 即巿股評

【盤房來料】港股短線超買需整固

隔晩美股顯著上升,小非農數字顯示經濟有放緩跡象,通脹應該壓得住,再加上鮑爺講話轉口風放鴿,最快喺12月議息時會放緩加息速度,市場憧憬美息見頂,貨幣政策有望最快明年由緊縮轉返去放鬆,美股三大指數上升,標指逼近4100阻力位,納指成功重返11400水平。至於港股噚晩ADR跟夜期已跟隨美股升勢重上19000大關,不過今早高開後,未能繼續高走,半日升幅無咗一半,萬九關得而復失。

恒指今早裂口高開461點,升幅一度擴大至640點,見19237半日高位,但財新中國11月製造業PMI續低過50,大市升幅收窄,升幅縮水至191點,見18788半日低位,其後略為回升,仍保住近半升幅,但半日收市都低過開市價。恒指半日收18895,升298點;國指升79點,報6453;恒科指升90點,報3888。半日成交額增至1254.11億元,當中有幾百億係噚日MSCI rebalancing趕唔切入機,今朝補返上板嘅貨,扣除呢一部份,半日成交應不足千億元。

藍籌股見高開有獲利盤湧現,友邦高開報80.55元,盤中曾見82元高位,中午升幅收窄至2.4%,但仍企到喺80元水平。港交所(00388)半日升4.6%,暫時喺320元水平爭持。ATMJ全線造好,呢期啲中概股表現強勁,港股呢邊嘅科網股食住個勢,呢浸由低位反彈力度不俗。不過騰訊(00700)未能企穩300元,美團(03690)喺180元之前亦掉頭,京東(09618)亦喺230元之前止步,阿里(09988)叫企穩80元水平,暫時都算係咁,四股升幅普遍超過3%,今日阿里升4.4%,表現最好。其他藍籌股普遍向上,只有大笨象(00005)半日跌0.3%,股價未能食住今日升市挑戰50元。

內地有意逐步放鬆防疫措施,市場憧憬內地通關在即,濠賭股今日落鑊,整個板塊升幅至少超過4%,永利(01128)跟美高梅(02282)半日升逾一成。另一個較突出嘅板塊係物管股,以民企物管股升勢較強勁,不過要作中長線投資,阿Man認為揀返國企或央企較為穩陣,始終內房嘅淘汰賽仲有排玩,路遙知馬力,民企短線喺鐘擺效應下係彈得勁啲,但長線嚟講,基本因素遠不及國企同央企。藥股跟火電股逆市下跌,前者估值始終係一個問題,後者則因為動力媒價急升一成,成本當然有不利影響,半日整個板塊全線下跌。

至於大市呢三日由16800至17000水平抽升逾二千點,至今早高位19237,短短三個交易日,升幅已接近14%,短線已呈超買,相信都係時候整固,短線支持位係之前久久未能突破嘅100天線(約18400),成功突破後企穩的話,100天線將由阻力變為支持,短線回調至18400至18600,回補今日嘅上升裂口,後市仍有機會向上挑戰19500水平,亦即係9月份由19500向下穿19000嘅下跌裂口。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads