隔晚美股三大指數升逾1%，都講過好多次，只要納指跟標指分別守到11000跟3900支持，美股仍然向好，重點係通脹數據能否增速下跌，加息周期盡快完結。不過反映中概股表現嘅金龍中國指數續偏軟，港股未見跟隨美股顯著上升，今早好淡爭持。
恒指高開36點，升幅曾擴大至逾百點，可惜高位未見買盤跟進，其後一度倒跌48點，見17375半日低位，不過至中午收市前，科技股回升，帶動恒指最多升183點，見17607半日高位後回順。中午恒指收報17497，升72點；國指升39點，報5940；恒科指升29點，收3544。世界盃效應下，半日成交進一步縮減至564.74億元，今日成交額隨時唔夠一千億。
藍籌股個別發展，金融類別股份普遍造好，當中以平保(02318)半日升1.3%表現較佳，其餘升幅不足1%。股神繼續減持比亞迪(01211)，其實市場應該唔意外，半日股價跌2.2%，已連跌六個交易日。領展(00823)同樣六連跌，半日股價再跌4.9%，藍籌股之中表現最差。
科網股先低後高，ATMJ以阿里(09988)半日升3%表現最好，雖然阿里持有嘅螞蟻據報遭中國有關部門處以逾10億美元罰款，但市場解讀為監管已告一段落，賠埋呢筆錢就一了百了。至於騰訊(00700)跟京東(09618)半日分別升1.4%及2.2%，京東重返200元心理關口；美團(03690)盤中一度低見134.1元，其後隨其他科網股回升，半日倒升0.3%。其他科網股普遍炒高，快手(01024)季度收入勝預期，半日升4.8%，值得留意係內地管完打機要限時，下一個要管制嘅範圍，有可能係限制睇短片，雖然暫時未有監管，但都先要有心理準備。
國企中字股繼續熱炒重組概念，除咗噚日升緊嘅基建股之外，今日見資源股都落埋鑊，不過阿Man選擇繼續做觀眾，對呢啲國企股始終有啲戒心。至於生科股今日有較大沽壓，之前有抗疫藥物推出嘅股份炒起，呢兩日都見回吐，康希諾(06185)半日跌一成，君實(01877)跟三葉草(02197)半日插逾半成，其他生科股跌超過1%至3%不等。
大市暫時受制於10天線(17626)，但20天線跟10天線穩步向上，10天線已升穿50天線，目前等緊條20天線升破50天線出現另一個黃金交叉，若然呢兩日可以企返10天線之上，仍有條件重返18000水平，並再挑戰100天線。
麥狄文
(徐狄怡‧證監會持牌人)
