共和黨未有如期於中期選舉中大獲全勝，目前多個州分仍未有結果，加上虛擬貨幣市場急挫，增加美股資金壓力，隔晚美股三大指數下跌，標指跟納指更挫逾2%。港股連跌兩日後，今早跌勢持續，早段更曾跌逾400點，不過暫時仍守20天線(15905)，萬六關失而復得。
恒指早段低開220點，報16138已經係半日高位，其後跌幅擴大至最多跌413點，見15945半日低位，之後跌幅略為收窄，萬六關失地收復，於該水平好淡爭持。半日恒指報收16053，跌304點；國指跌118點，收5416；恒科指收3193，跌87點。半日成交額進一步縮水至558.75億元，話就話調整成交縮減係好事，但港股要繼續反彈，喺萬六水平要成交再放大配合回升，咁後市先可以睇返好啲，否則失守萬六再失20天線，由14600水平展開嘅反彈浪，隨時玩完。
藍籌股普遍下跌，友邦(01299)跟大笨象(00005)半日分別跌1.9%及1.7%；港交所(00388)跌2.1%，不過暫時港交所仍企得穩240元樓上，整固完仍然有條件繼續向上。喺美債息仍然高企下，科網股偏弱，加上內地疫情反覆，未有耐可以放鬆防疫措施，中概股隔晚喺美股受壓，今日返到嚟港股呢邊，ATMJ全線向下，騰訊(00700)跟美團(03690)分別跌1.9%及1.1%，京東(09618)跟阿里(09988)則齊齊跌逾3%，主要係電商搞嘅雙十一活動，似乎未係好吸引到客仔，營業額未見激增。至於內銀股就偏軟，阿爺話要用2500億元救內房，咁最後呢條數都係要啲內銀埋單，所以就算大市確認見底反彈，內銀股都唔會喺考慮入貨名單之中。
汽車股呢排亦係另一個較疲弱嘅板塊，繼股神再度減持比亞迪(01211)股份之後，美國嘅Tesla亦畀大股東Elon Musk減持，口痕友話佢啱啱買完Twitter等錢使，其實減持嘅最大理由咪係套現囉。兩個主要股東減持兩隻中美電動車龍頭，其他電動車股亦捱沽，比亞迪(01211)半日再跌3.3%，目前險守180元。其他汽車股錄得至少4%跌幅，吉利(00175)跌逾半成，藍籌之中跑第尾。而小鵬(09868)跟蔚來(09866)半日更跌逾一成。
世界盃開鑼在即，市場憧憬世界盃利好啤酒銷售，啤酒股逆市向上，百威(01876)半日升2%，已經係表現最好藍籌股。青啤(00168)跟潤啤(00291)逆市有進賬，不過升幅不足1%，反而酒吧股海倫司(09869)半日升2.4%，勁過啤酒股。
暫時港股仍然守住20天線及萬六心理關口，不過15800水平係牛證重貨區，唔排除喺整固期間，踩多腳殺牛順手試埋條10天線，不過試完呢啲短線支持，唔能夠嗱嗱聲上返16000企穩，咁呢一輪嘅反彈就有機會結束。相反喺現水平整固，其後成交再放量回升至16200至16400之上，咁大市反彈目標17500至18000可維持不變。
麥狄文
(徐狄怡‧證監會持牌人)
