隔晚美股反覆，聯邦公開市場委員會（FOMC）公布加息0.75%後，美股一度倒升，但其後鮑爺又放鷹，指暫時無條件可以減息，大家認為明年上半年美國都減息無望，美股再度走軟，尤其科技股沽壓較大，納指跌逾3%，道指跟標指分別跌1.5%及2.5%。
目前美債息仍然高企於4%水平，但按照FOMC要將通脹控制嘅話，聯邦基金利率最終可能要加至5%水平，較市場預期為高。喺美股回吐下，港股今日亦低開，兩日反彈逾千點後，今早曾跌逾500點，幾乎抹去近半反彈升幅。
恒指低開349點，跌幅曾收窄至203點，見15623半日高位，雖然15000水平有資金入場，但都係較為審慎無意高追，加上早前博反彈嘅資金亦急急腳走人，半日最多跌525點，見15301，10天線落咗嚟15351，叫做守咗條10天線。恒指半日跌446點，報15381。國指跌163點，報5191；科指插114點，報3041，國指跟科指齊齊跌逾3%。半日成交額只有561.59億元，半日成交額仲少過噚日打風，一句到尾，資金對港股信心仍未恢復，暫未見資金肯積極買貨。
藍籌股普遍向下，ATMJ又腳軟，騰訊(00700)跟美團(03690)半日跌逾3%；阿里(09988)跟京東(09618)半日則跌逾半成，表現較為疲弱，尤其阿里，70元好明顯由支持位變阻力。
其他科網股都跟住納指顯著下跌，另一科技藍籌網易(09999)半日跌6.7%。友邦(01299)跟港交所(00388)半日跌1.8%及2.4%，港交所企唔穩230元，都係有啲危。
至於內房股今日早段曾頗為醒神，因為內地有媒體報道，深圳樓市回暖，光明區南山區兩個新盤開售即日沽清。可惜內房股本身已內傷，碧桂園(02007)半日跌2.5%，旗下碧服(06098)亦跌0.6%。違約未能如期還息嘅龍湖(00960)半日跌近6%。不過又唔係隻隻內房都再跌，龍光(03380)、綠城中國(03900)跟旭輝(00884)半日逆市升逾2%。
美國再加息0.75%，金管官亦宣布將基本利率上調至4.25%，即時生效，本地地產股全線下跌，普遍跌1%以上。
喺加息周期未完結，而本港樓市仍然向下嘅環境之下，本地地產股估值再平亦好難吸引資金坐定定，市場預期明年樓價仍要下跌5%至10%，睇嚟本地地產股短期都無乜運行。
暫時恒指喺10天線爭持，暫時淡友仍佔上風，不過喺萬五水平，開始見有資金流入買吓貨，過去幾日港股成交都維持喺1200億之上，即使噚日打風開唔足一日市，亦keep到過千億成交，只係缺乏利好消息之下，好友要抗衡淡友都幾吃力。總之恒指企到喺10天線，仍有條件反彈，只係反彈力度比較弱；一旦再失10天線，唔排除又繼續向下尋底。
麥狄文
(徐狄怡‧證監會持牌人)
