美滙持續高企，美國10年期債息更抽升至4厘水平，美股動彈不得。而人民幣更跌穿7.2關，離岸價跌至有紀錄以嚟嘅低點，足以震散港股，恒指一度跌近500點，再創11年低位。
恒指低開156點，見17703為半日高位，之後跌幅曾擴大至499點，見17360半日低位。中午恒指跌417點，收報17442；國指跌125點，報6025；恒科指盤中一度跌3.3%，半日跌96點。收3570。半日成交額523.3億元，個市隊到咁款，都無乜資金願入場掃貨，唔通真係便宜莫貪。
藍籌股全線下跌無一倖免，ATMJ齊齊過堂，騰訊(00700)跌1.6%；美團(03690)跌2.2%，仲守住170元都算硬淨；阿里巴巴(09988)跌2%；京東(09618)挫4.4%，盤中一度逼近200支持位。友邦(01299)半日跌2.6%，大笨象(00005)跌逾4%，逼近40元支持，不過依家啲支持位，話穿就穿，弱不禁風。恒安(01044)半日微跌0.1%，已經係表現最好藍籌股。
人民幣插水，內房股重創，皆因全部都係持有人民幣資產，好難避過一跌。旭輝(00884)半日勁跌26%，旗下旭輝永升(01995)半日亦跌18.2%。碧桂園(02007)跟碧服(06098)半日分別跌9.2%及10.4%，係兩隻表現最差藍籌股。其他內房股閒閒地跌4%以上，唔少內房半日跌逾半成，整個板塊相當慘情。
有消息指蘋果公司放棄增產，蘋概股全部跌到一仆一碌，高偉電子(01415)半日跌近13%最大鑊，其他蘋概股跌幅由0.7%至3.8%不等。除咗人仔仆直之外，英鎊亦低處未算低，除咗大笨象插水之外，英國重資產股，長實系、渣打(02888)跟保誠(02378)全部難逃一跌，半日跌幅超過3%。講真呢啲市真係無嘢好講，沒有最低，只有更低，現貨真係咪多手撈貨，唯一可以做嘅就係彈高沽，至於幾時邊個位見底，阿Man唔去估，亦無興趣估，一諗到幾隻重磅股，騰訊、阿里、比亞迪(01211)等等，都有個巨型沽盤等住沽貨，心理陰影揮之不去，再加上資金持續外流，美元強勢下，美股都唔掂，更何況其他市場。
