熱門:

2022年6月22日 港股直擊 即巿股評

【盤房來料】股仔相繼落鑊爆炒並非好現象

隔晚美股喺上周急挫超賣後反彈,三大指數升逾2%,但若果認為美國總統拜登稱衰退並非不可避免,能夠暫時紓緩市場恐慌情緒,似乎言之尚早。唔少大行都睇淡美股後市,並指衰退難以避免,經濟喺加息周期下亦難軟着陸。

雖然美股隔晚急彈,但今早喺亞洲時段再度回軟,道指期貨下跌,加上港元再次觸及弱方兌換保證,金管局再承接112.49億港元沽盤,本港銀行體系結餘跌至2418億元。不過暫時呢個結餘數目,並不足以對香港經濟構成任何負面影響,但喺港美息差繼續擴大下,資金只會繼續流走,留意當銀行結餘跌穿1000億港元關口,屆時本港資產將面對更大下調壓力。港股喺過去三個交易日反彈逾700點後,半日一度跌近300點。

恒指低開89點,開市後跌幅收窄至40點,見21519半日高位,其後跌幅繼續擴大,半日一度跌295點,見21264半日低位。恒指半日跌267點,報21291;國指半日跌112點,收7437;恒科指半日跌119點,報4640。半日成交只有639.2億元,資金唔願意呢啲位入場,買賣兩閒。

藍籌股個別發展,中電(00002)已連續13個交易日下跌,繼日前表示公司喺外地投資失誤而可能構成虧損後,噚日又因為火警令新界西北三大地區大規模停電,對中電嚟講可以話係雪上加霜,半日再跌1.3%。四大重磅科網股半日全部腳軟,騰訊(00700)半日跌1.2%,阿里(09988)跌2.3%,美團(03690)跌3.9%,京東(09618)跌4.7%。兩大重磅藍籌股友邦(01299)跟大笨象(00005)半日回吐,分別跌2%及0.5%。

至於早兩日熱炒嘅互聯網醫療股,國家藥監局擬禁第三方平台直接參與藥品網售,互聯網醫療股今日捱沽。噚日急升嘅阿里健康(00241)半日跌12%,成為表現最差藍籌股。京東健康(06618)跌8.8%,平安好醫生(01833)之前未見勁升,自然今日亦跌得少,僅跌2.6%。

汽車股回勇,今日跑贏大市,吉利(00175)旗下電動車品牌極星將上市,半日升5%,成為表現最好藍籌。其他電動車股,全部都有唔錯表現,理想汽車(02015)更創本港上市新高,半日升5.7%。生科股續有炒作,留意炒到長江生命科技(00775)呢啲四五線生科股仔,仲要半日升近五成,開始禾雀亂飛,要加倍小心。其實呢幾日望見升幅榜,升幅頭幾位嘅股份,都係啲size細細,兼且平日無乜成交,喺單日成交急增下升逾倍,呢啲並唔係乜嘢好現象。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads