噚日阿Man講咗，美股嘅投資者，因為鮑爺一句加息0.75厘非常態而周三晚反彈係唔多合理，似乎錯誤解讀咗佢嘅意思，皆因喺通脹高企，而債息完全唔見回落下，根本無可能當鮑爺呢句說話係鴿派宣言。終於噚晚呢班投資者清醒返晒，嗱嗱聲沽返啲貨出去，美股三大指數跌破今年低位，除咗明白要壓抑通脹，聯儲局要大大力加息之外，同時亦憂慮到經濟衰退，甚至陷入滯漲局面。
至於港股呢邊就低開高走，全靠兩個消息，一個消息係中美就削減關稅可能漸見眉目，雙方或有較高級別官員，就此進行談判之餘，中美兩國最高領導人，短期內或再進行電話會談。另一個消息係俄羅斯證交所宣布，下周一開放買賣12隻港股，包括騰訊(00700)等等，而買賣股份嘅數目會繼續增加。如果呢個消息令個市上升，阿Man又大惑不解喇，一來俄羅斯有幾多資金會直接投資港股，呢個係第一個疑問，第二個疑問係家下歐美國家都視俄羅斯為入侵烏克蘭嘅侵略者，對其進行不同程度嘅制裁。咁阿Man又多一個疑問喇，俄佬嚟買港股，就會出現交收呢個程序，咁當一同俄方金融機構有交易，又會唔會惹嚟美國嘅制裁呢……如果當呢個係好消息嚟炒，阿Man都真係一頭黑人問號。
講返個市先，恒指低開128點，最多跌148點，曾見20697半日低位，其後止跌回升，最多升248點，見21094半日高位後回順。半日恒指升163點，報收21009點，並收復50日線；國指升70點，報7329；恒科指半日升63點，半日報收4610。
藍籌股個別發展，但重磅嘅友邦(01299)半日升2.3%，加埋京東(09618)跟美團(03690)分別升4.3%及3.3%，三股已為恒指提供115點升幅。騰訊跟阿里(09988)雖然僅升0.4%及0.9%，但唔跌呢下都已經好幫到手。至於港交所(00388)因為俄交易所下周起容許經紀買賣12港股，半日升2.1%，呢下阿Man就唔多認同，不過既然市場判斷係利好息，咁都要尊重市場嘅決定。不遆今日個市話就話上返21000，但都有唔少藍籌股腳軟，包括新貴宏橋(01387)半日跌3.8%；申洲(02313)半日亦跌2.1%；而金沙(01928)跟藥明生物(02269)半日分別跌2.5%及1.7%。
Targa將從RiverStone和高盛收購電動汽車生產商Lucid Group，消息刺激本港電動車股向上，當中理想汽車(02015)半日急升7.9%；小鵬汽車(09868)升近半成，其他汽車股升幅普遍超過1%。
教育股愈炒愈離譜，今日去到更加細粒嘅教育股落鑊，成實外教育(01565)半日都炒高四成，隨時下書升幅縮水。望下最先落鑊嘅新東方在線(01797)北水喺上半場係咁食糊，半日開始回吐。都係嗰句，呢啲泥漿摔角式炒作，阿Man自問無膽參與，堅持繼續食花生，雖然無得贏，好過盲目跟風，高位追入損手爛腳。
麥狄文
(徐狄怡‧證監會持牌人)
