美股上周五顯著下跌，5月份CPI升至8.6為40年高位，加息壓力大增，10年債息高企於3厘之上，納指跌逾3%，而道指期貨今早續跌。美元強勢下，人民幣今早走弱，港股上周五夜期及ADR已先跌一步，今早跌勢持續。恒指低開643點，早段曾跌676點，見21129半日低位，21000左右有支持，跌幅曾收窄至486點，高見21320。恒指中午跌612點或報21193；國指跌216點，報7392；科指跌176點，報4649。半日交額933.32億元，又唔算特別多，21000水平咁嘅成交額屬於正常。
藍籌股幾乎全軍覆沒，只有三隻逆市上升，電能(00006)跟長建(01038)分別升0.9%及0.3%，都係超人系股份，另一隻逆市升嘅藍籌係比亞迪(01211)，預期為Tesla供應電池，呢個消息足以撐住其股價，半日升0.4%，盤中更創321.8元年內新高。其他藍籌股全線下跌，今日成為藍籌股嘅四隻新貴，中芯(00981)先升後無起跌，其餘三隻新貴全部跟個市一齊跌，東方海外(00316)跌3.7%；中國宏橋(01378)跟中升(00881)分別跌5.9%及2.1%。
喺今個升浪之中嘅主要上升動力ATMJ，全線向下，阿里(09988)半日跌近6%、騰訊(00700)本日跌4.6%、美團(03690)跌4.2%、京東(09618)則跌2.7%。金融股跌勢亦顯著，友邦(01299)跟大笨象(00005)齊齊跌逾2%。人民幣離岸價急挫，而多間內房企業上月銷售按年大跌，內房股普遍向下，碧桂園(02007)半日跌8.4%，藍籌股中表現最差，碧服(06098)半日跌7.8%緊隨其後。其他內房股閒閒地跌半成或以上，合景泰富(01813)半日跌近一成，創52周新低。
汽車相關股個別發展，比亞迪逆市上升；長汽(02333)回購股份，股價半日逆市升4%；吉利(00175)則回吐2.6%。教育股繼續喪炒，新東方在線(01797)再爆升74%；其他教育股至少升一成以上，只係咁樣急升法，再追貨嘅話，好難設定個止蝕價，實在好難計算值博率，呢啲情況都係食花生算數。
大市升至22000水平後，短短兩個交易日急跌近千點，至21000水平暫見支持，大市果然係維持上落市格局，雖然失守咗10日線，但20及50日線匯聚區應該會有唔錯支持，呢個位亦大約係恒指保力加通道中軸，除非呢兩條線齊齊失守，咁大市再回落至保加加通道底部，即20000樓下嘅機會先存在。
麥狄文
(徐狄怡‧證監會持牌人)
