美股三大指數偏軟，但反映中概股表現嘅金龍指數表現大勇，升勢由一二線股份延伸至三四線股份，炒到出煙，唔少之前跌咗八九成嘅中概股大幅反彈，刺激隔晚夜期跟ADR升抵22200水平，重上100天線，港股今日亦隨之高開。
恒指高開106點，一度升128點，見22142半日高位，創兩個月新高，但100天線得而復失，未能企穩，大市掉頭向下，曾倒跌167點，見21847半日低位後喘定。半日恒指收報21961，跌52點；國指報7649，跌30點；恒科指跌37點，收4780。半日成交額915億元，嚟到22000水平附近，入市資金較為審慎。
隔晚金龍指數大升，重磅科網股高開，但未能企穩高位，阿里巴巴(09988)一度高見116.3元的逾兩個月高位，但其後升幅收窄至3.2%，半日收112.3元，但喺ATMJ四大天王之中，仍然跑贏。騰訊(00700)一度升越400元大關，高見406.8元，但半日升幅收窄至1%，重返400元樓下，半日收395.6元。美團(03690)和京東(09618)同樣高開低走，兩股半日分別倒跌2.6%及1.9%。暫時ATMJ四股上半場均以陰燭收市，唔排除短期要唞唞，至於係見頂回落，定係短線回吐，則仍有待確定。其他藍籌股普遍偏軟，海底撈(06882)半日跌逾4%，係表現最差藍籌股。
物管股今日反彈，喺大市整個反彈浪之中，內房股跟物管股一直無動於衷，但今日卻逆市向上，大部分物管股都錄得逾2%升幅，個別更升逾半成。不過一個升浪之中，連最落後嘅板塊都起動，咁今次反彈浪係咪已經去到尾聲，都已經有啲啟示。除咗物管股呢個最落後嘅板塊都起動，之前跌到殘過蔗渣嘅教育股，又係趁今次嘅反彈浪落鑊，今日呢個板塊續升，升勢最勁嘅就係次一線嘅教育股，反而啲一線嘅教育股升勢開始放緩，甚至半日出埋陰燭。
波羅的海乾散貨指數(BDI)連跌三日，創超過一個月新低，航運股全線捱沽，相關股份閒閒地跌半成或以上，只有中遠海發(02866)半日跌1.8%，已經係板塊內跌勢最溫和。噚日阿Man已講反彈浪或跟尾聲，雖然恒指一度上試100天線，但得而復失後，連22000關亦未能企穩，唔排除喺幾隻重磅股呈超買下，大市要唞唞，至於唞唞之後能否再下一城，取決於幾隻重磅科技股表現。
麥狄文
(徐狄怡‧證監會持牌人)
