今年第一季已經過去，唔知大家嘅投資表現如何？如果有好表現嘅話，當然第二季可以繼續發揮；但如果有閃失嘅話，咁就要好好留意策略上有咩地方可以改善、跟進，務求調整一個適合自己、可以整合一個令自己發揮得更加好嘅投資策略，喺餘下日子追返之前所失。
噚日揀咗隻恒指牛(62982)出嚟，以小時圖守得到20小時線(小時圖20線)為出場訊號。不過，下半場其實喺1點至2點，同埋2點至3點呢兩段時間，都有見過指數係失守20小時線，去到最後一個鐘，先至見到指數守得住20小時線，以呢個鐘嚟計，最低位同20小時線只係爭2點，策略計都算是守得到20小時線。以最後一個鐘(62982)高低位做過0.063元/0.0545元計，平均買入價為0.0585元。
今朝恒指開市見返大裂口下挫，跌303點，報21693點，呢個位剛好踩入牛證第一層街貨21600至21699點嘅範圍。甫開市之後指數二話不說地向下再插，21600點火速失守，第一層牛證陣亡，而隻(62982)亦見重傷(撞鬼！3月第一注又係負數，4月又係咁)。依家9點46分，五分鐘圖見指數落到21600點附近似有橫行情況，而Slow STC(14,3)兩線都於超賣範圍見橫行；比較重要嘅係，小時圖上保歷加通道口未見有拓闊情況，賭仔魔鬼心態隨即出現：都跌咗咁多，唔爭在捱到10點，睇下小時圖條保歷加通道保唔保到我家肥貓啲零食。
好不容易捱到10點8分，指數開低之後終於見跌幅收窄，至依家跌幅收窄至跌278點，做緊21718點，而隻(62982)當然未完全恢復元氣啦，今日星期五，只係想輸少一格得一格啫。
再到10點12分，指數喺五分鐘圖上稍稍上破50分鐘線(五分鐘圖10線)，而Slow STC(14,3)都見有觸底嘅情況，唯有一路睇住個五分鐘圖，一見唔對路就搵位走啦；萬一小時圖底線無給力，指數再向下碌落山嘅話，唔單止要立斬隻(62982)，仲要反手追淡倉以彌補損失。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
