俄烏戰火未停，雖然雙方已安排談判，但市場對此不抱希望，加上憂慮俄羅斯石油禁運風險，油價今早飊升至13年高位，亞太區股市普遍下跌。港股喺過去三個星期已累跌3000點，今早再挫逾千點，創2016年7月以嚟低位。恒指低開596點，見21308已見半日高位，其後跌幅擴大，最多跌1078點，見20826半日低位，亦創68個月以嚟新低，之後跌幅收窄，恒指半日跌746點，報收21159；國指跌238點，報7448；恒科指再創成立以嚟低位，見4455，半日跌186點，報4551。半日成交額增至1023.44億元，成交增加後指數跌幅收窄，今日有機會短期超賣後見咗20800短期底部。不過短線港股即使有技術反彈，但至22000或有阻力，一旦外圍情況仍然偏淡，唔排除港股再度探底，或於20800形成雙底方能喘穩。
藍籌股又未至於全軍覆沒，石油股跟油價逆市上升，以中石油(00857)半日升逾3%表現最好。長和系表現亦硬淨，長實(01113)半日升3%，上周五魚升半成嘅長建(01038)今日再升1%，不過長和(00001)仍要隨大市下跌，跌幅不足1%。美團(03690)半日跌近8%，成為表現最差藍籌股，金沙中國(01928)跟藥明生物(02269)半日亦跌逾7%，跌幅較為顯著。
多國對俄羅斯實施制裁，其中金融實制最為明顯，國際金融機構受壓，面對經營環境不明朗，大笨象(00005)跟渣打(02888)雙雙跌逾6%，友邦(01299)半日亦跌逾3%。今日多隻藍籌創52周低，包括阿里巴巴(09988)再創上市後低位，紅底股身份失去後，短期反彈100元由之前支持位變成阻力位。兩隻恒指成份股新貴農夫山泉(09633)跟聯想集團(00992)未能打破呢兩年染藍即跌嘅魔咒，半日分別跌6%及3.7%。不過內房股今日有個別股份表現唔錯，中海發展(00688)半日逆市升2.7%，阿Man中長線睇好嘅少數內房民企碧桂園(02007)半日亦由跌轉升，半日升逾1%，兩股係今日少數逆市上升嘅藍籌之一。
除咗油價飊升，金價亦一度升至2000美元水平，金礦股繼續受捧，招金(01818)半日升近一成，表現最好，其他金礦股跟資源股均見逆市上升，升幅普遍超過2%。化肥生產大國俄羅斯籲停出口，化肥股繼續做好，不過呢個板塊內嘅股份，通常市值較細，容易被人為操控，追入風險高，值博率有限。
麥狄文
(徐狄怡‧證監會持牌人)
