俄烏戰事持續，雖然歐大加強對俄羅斯制裁，將俄羅斯多間銀行剔出SWIFT支付系統，不過普京似乎無有怕，更下令俄國核武處最高戒備，加劇金融市場震盪。美股上周五三大指數反彈，但今早喺亞洲時段，指數期貨又顯著下挫，港股上周累跌150點後，再創近兩年新低。
恒指高開50點，報22818，見咗半日高位，但一開市已即掉頭向下，穿埋舊年12月20日低位22665，半日最多跌361點，見22406，創近兩年低位。恒指半日跌315點，報22452；國指跌92點，報7899；恒科指跌72點，報5040。
藍籌股只有少數上升，當然一對石油股榜上有名，喺油價急升重上每桶100美元之際，唔少大行相繼提高今年油價預測，中海油(00883)跟中石油(00857)齊齊逆市升0.7%。另一隻表現較突出藍籌係網易(09999)，半日升逾5%，藍籌之中升幅最大。藍籌有11隻創咗52周新低，阿里(09988)更創喺本港上市低；美團(03690)跟港交所(00388)跌市52周低位，分別跌2.1%及3.8%。騰訊(00700)重返去年8月接近400水平。吉利(00175)半日急跌6.3%，汽車股中，佢表現都算最差。大笨象(00005)半日跌1.1%，中移動(00941)亦跌逾2%。
黑海航運幾乎陷入停傾，全球集運供應鏈仍處於繃緊狀態，航運股乘機落鑊，去年盈利以倍數增長嘅太平洋航運(02343)半日升6.7%，東方海外(00316)跟中遠海控(01919)半日分別升5.5%及4.8%。
其實喺政治戰爭事當中，每一個消息都足以對股市帶嚟震盪，喺避險情緒高漲下，缸邊友何止無心戀戰，直情係盡量套現要錢唔要貨。阿Man早於年初對美股市況開始轉弱之際，叫大家盡量輕倉，雖然港股估值已低迷，當估值較高嘅美股出現深度調整，港股未必會跟足跌咁多，只係加埋地緣政治因素，全球股市亦被沽售，港股亦難獨善其身。若然恒指本周仍未能重返23000至23500點，進一步向下尋找支持機會大增，下一個恒指關鍵位係21500至22000，當然阿Man唔想睇得太過悲，但事實係無資金入場嘅情況下，暫時港股都係得個捱字。
麥狄文
(徐狄怡‧證監會持牌人)
