上個星期五朝早揀咗隻恒指熊(54575)，認真，向來持貨過夜嘅興趣不大，所以隻(54575)基本上都可以喺上個星期五嘅下晝市湊夠數就走，事關指數比較大部份時間都處於一條窄窄嘅保歷加通道運行，Slow STC(14,3)基本上都無乜機會落到超賣水平。以上個星期五【輪證下半Part】出文時間2點39分起計至4點收市，(54575)高低位做過0.133元/0.122元計，平均沽貨價為0.1275元，對比平均買入價0.116元計，平均賺幅為9.91%。
依家9點28分，恒指已經完U，開市升70幾點，再次上返23600點以上水平，喺五分鐘圖上見到指數喺上個星期五都真係行咗個好大型嘅「楔形」，「楔形」有待變格局嘅意思，本以為今日指數高開之後會再向上搶高，原因係五分鐘圖上Slow STC(14,3)兩線嘅位置其實剛好喺中軸位，只係開市抽升所以兩線呈上，不過，喺正式開市之後頭嗰五分鐘，指數已經好快又升轉跌，至依家9點41分，指數向下失23500點，即係將第一層牛證街貨23500至23599點嘅668張期指。
又本以為指數會再落多100點向住23400至23499點嗰接近2000張期指搵食啦，又無喎，反而又一把向上，將指數喺五分鐘圖上嘅保歷加通道底打返上中軸位。換隻騰訊(00700)出嚟睇就明點解啦，事關今朝騰訊股價都係上下落下咁，但開市15分鐘之後就忽「大陽燭」抽高，怪不得指數又一下子被抽上。懶嘅捉隻好倉小注過新年博新年返嚟開紅盤算囉，過咁耐時間用牛熊證都可以，都揀遠啲就安全啲；當然你亦都可以用返輪，搵年期長啲咁時間值就無蝕得咁緊要。恒指Call(18800)，行使價24200點，同現價有2.8%價外，今年7月底先至期，逾11倍槓桿用嚟過新年都夠啦，小注好啦，呢啲真係博攞嗰意頭，唔係博老命呀！
今日年廿九，我+我家老爺+我家肥貓祝大家新年進步！三財入庫！買乜贏乜！(今日半日市，【輪證下半Part】暫停)呢個新年真心忙，事關聽日大年初一(2月1日)撞正我老媽5X歲牛一，還好同老爺一早準備好所有嘢，蛋糕都訂埋，今晚食團年飯時可以同屋企人一齊同佢提早賀壽。
周五(4日)再同大家見面！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
