隔晚美股插水，聯儲局最近一次議息會議紀錄顯示，加息可能較預期早，而縮表亦有機會提速，債息趨升下，股市受壓，科技股沽壓尤其大，納指隔晚跌逾3%，高估值股份面臨價值重評，被狠殺估值。
不過美股嘅底子一向好，而面對通脹來臨，投資股票市場係抗通脹嘅最佳辧法，阿Man估計，即使美股出現一波較為震盪嘅調整，調整過後，美股仍有條件回復升勢，只係要有心理準備，今年美股唔會好似舊年咁升得順風順水，今年表現會較為反覆，波動性會加劇。
至於港股今日再度尋底，恒指低開64點，一度倒升115點，見23022點半日高位，但A股受壓，內地創業板跌逾2%，拖累港股掉頭下跌197點，二萬三關得而復失，半日最多跌197點，見22709半日低位。其後A股收復部份失地，內地創業板指數跌幅收窄至0.95%，港股亦低位略彈，半日跌幅收窄至百點以內。恒指中午報22824，跌82點；國指報7984，跌31點；恒科指跌30點，報5292。
藍籌股普遍腳軟，中移動(00941)噚日裂口高開後未能高收，以陰燭散場，今日再回吐1.1%；金融股就一向唔係阿Man杯茶，升得慢又回得快，今日普遍回吐1%以上。雖然美國嘅重磅科技股跌到一仆一碌，但今日科技股喺香港呢邊，又未至全軍覆沒，京東(09618)跟阿里(09988)半日分別升2.1%及3.6%，在眾藍籌股中跑出。美團(03690)則彈0.4%，仍未重返200元水平。至於剛減持Sea嘅騰訊(00700)，有分析擔心其不單面臨拆骨，更未能再以收購相關同業壯大業務，股價半日再跌0.3%，睇嚟之前450元嘅支持位，將變成短線阻力。
印尼實行煤炭出口禁令，噚日推遲跟當地煤礦公司會議，以煤作為發電原料嘅火電股捱沽，雖然華潤電力(00836)傳有計劃分拆能源業務上市，半日市跌近一成，其他火電股閒閒地跌1%至接近5%不等。至慘係啲清潔能源股份，煤炭供應點都唔會影響其業務，無啦啦陪跌，好似風電股龍源(00916)、核電股中廣核(01816)都算跌得寃枉。
生科股繼續捱沽，藥明生物(02269)斥資39億回購，股價亦唔識彈，半日跌4.2%，睇嚟80元支持穿咗之後，又會成為阻力位，短期呢隻都難博反彈，始終經過險被美國列入黑名單後，由低位反彈至90元水平再失守，已經元氣大傷，短期有波幅，冇升幅，可以睇少隻。其他生科股同樣捱沽，跌幅由超過2%至8%不等。
今日無啦啦有一堆細價股暴跌，其中華盛國際(01323)暴跌逾九成後停牌，成交急增好明顯被洗倉；另多隻細價股也急跌，包括BENG SOON MACH(01987)半日瀉94%；首都金融(08239)跌92%；漢思能源(00554)跌76%；權威金融(00397)跌74%；首灃控股(01703)跌73%；先機企業(00176)跌72%。
呢堆暴跌股都有個共通點，就係今日主力沽家都係凱基證券。至於呢啲股份幕後由邊個持有，阿Man梗係唔知，但就知呢堆股份要止跌，至少要見凱基沽盤停止。阿Man自2015年內地熔斷事件後，已唔再炒任何細價股，提醒大家呢類股份都係避之則吉，家陣嘅情況更唔應該接飛刀，從來細價股都係人為操控，一旦莊家爆煲走人，單日跌八九成係等閒事，爆起上嚟真係走都無得走，隨時輸到渣都無得剩。
麥狄文
(徐狄怡‧證監會持牌人)
