噚日出咗隻恒指熊(67138)，下半場開市無幾耐見到恒指五分鐘圖Slow STC(14,3)出超買時落場，不過等到收市之前，有見到Slow STC(14,3)回落，不過回落嘅水平都未去到超賣，(67138)唯有焗住過夜。噚日完埋U盤之後恒指跌幅收窄，五分鐘圖上仲見到尾市出「大陽燭」飆返上去，唉，真係嚇死寶寶，不過噚晚收到Push話阿里巴巴(09988)ADR跌到唔好話阿爸，連阿媽都唔認得埋，咁先至瞓到覺好嘅。
依家9點16分，我家老爺剛剛出門口返工，又得返我同肥貓兩個喺屋企，呢期肥貓朝早都好興坐喺我隔離監視住我做嘢，唔知係咪佢發現咗屋企嘅罐罐存貨所剩無幾，同埋之前開咗罐趁特 價買返嚟嘅大罐罐(但佢一啖都唔吼)，擔心家境嘅問題，所以通常都會部足一個朝早；既然肥貓係擔心嘅話，咁就試下發揮你嘅喵功，喵返個市落嚟啦，咁隻(67138)就可以變好多罐罐啦。
嚟到9點20分，肥貓喵都無喵過(其實佢好少嗌)，恒指完U開市跌成385點，25000點再次失手，開市報24934點，好啦，今晚開罐貴嘅兼聽日放假去買返啲新嘅返嚟啦。其實喺未開市之後都已經同聊天室嘅戰友講定開市之後可以搶淡倉，博指數再向下殺牛，你睇埋牛熊證街貨圖就明架啦。
喺牛熊證街貨圖上見到指數開市價已經殺死咗首三層牛證，呢度夾埋有相當於612張期指，但係喺24800至24899點同者24700型24799點呢兩層先至重頭戲，因為呢兩層都有過千張期指街貨喺度。到正式開市之後，可能我家肥貓知道有罐罐食，所以都已經瞓著咗，而恒指大裂口向下落咗去之後，一度穿過24900點，變相殺多一層牛證街貨，被收回期指總數變成1275張期指，而截至依家9點37分指數彈返高少少，去返249XX點附近徘徊，唔通又好似噚日咁低位橫行至收市為止？唔理咁多，(67138)等埋恒指五分鐘圖Slow STC(14,3)落到超賣先至收工先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
