噚日揀咗隻恒指熊(67415)，入咗之後恒指忽然抽升多一下，捱完呢棍之後，至收市前都未見Slow STC(14,3)向下回落。不過，見尾市條Slow STC(14,3)上到超買位，其實自已喺聊天室都有同戰友們講可以小注淡倉博第二日出裂口下跌，呢種唔係咩高難度玩法，其實同平時做Swing Trade一樣，只不過今次見Slow STC(14,3)上到超買而出淡倉，博Slow STC(14,3)再次下行係第二日嘅事咁解，所以(67415)亦都可以當過夜用。
今朝恒指完U後見指數下跌咗20幾點，絕對唔係一個好勁嘅下跌裂口，但就留意到Slow STC(14,3)見高位回落嘅情況，呢個就係最想見到嘅畫面。到正式開市後，指數向下，跌到大約9點50分左右，見五分鐘圖上Slow STC(14,3)兩線雖然未到超賣水平，不過已經有觸底返彈嘅情況，呢個時侯走(67415)的話，以當時(67415)高低位做過0.078元/0.071元，平均沽貨價為0.0745元，對比噚日平均買入價0.064元，過夜平均賺幅有16.41%，都算不錯。
依家10點30分，身邊好友由噚日到今朝都send message問候我，部份曾經都患有甲亢嘅仲分享咗好多心得比我，放心啦，今日摸自己條頸好似無咁腫(一陣真係要出去見人，好彩天氣轉涼，可以帶條頸巾出去))，只係連續兩晚失眠有啲難頂，更難頂嘅係，喺10點35分左右，指數忽然向下跌逾200點，(67415)都係賣仔莫摸頭好啲，好彩聊天室戰友今朝開市有出到淡倉啫。
其實恒指由10月27日開始，裂口下挫令指數喺日線圖上出「孤島頂」之後建議開長Put(只係我個人無耐性啫)，至今指數累跌有1000點咁上下，隻長Put(如果未走)都真係禾味。又咁講，累跌過千點都真係有唔少資金會吼低入好倉博大市反彈，但其實咁樣會令到牛證愈來愈肥，指數向下動力同誘因亦愈來愈，如是者令指數更會追住重貨牛嚟殺，即使依家上新證只係需要三日時間，但你諗下三日前你出貼價熊，三日後隻熊仲係唔係貼價？
依家10點41分，指數殺咗牛證第一層24600至24699點，呢度有600幾張期指，而24500至24599點變成最貼價街貨，有成過千張期指，恒指熊(68793)，收回價25200點，槓桿約39.88倍夠做Day Trade，依家10點49分見指數喺五分鐘圖出咗「錘頭」，都係等指數彈返上高少少嘅位先至出場，進取嘅可以用50分鐘線(五分鐘圖10線)或100分鐘線(五分鐘圖20線)，安全嘅當然可以等Slow STC(14,3)上返超買先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
