天氣開始轉涼，拎咗出咗成個星期嘅暖窩，我家肥貓終於都識得匿入去瞓，不過夜晚都係喺梳化上面瞓，可能可以大字型咁擘晒脾瞓覺掛。
今個星期為10月最後一個星期，星期四(10月28日)唔止係識咗廿九幾年嘅中學同學生日，仲係期指結算日，雖然無人話過期結日指數一定會做好，只不過都真係十次有九次係咁。而今日見恒指牛熊證街貨圖，最近嗰五層熊證街貨都有期指張數減少嘅現象，而牛證就繼續有新增街貨層上場，今日見最貼價上移至25700至25799點，牛熊兩者中間位就係)26200+25799)/2=25999.5點，以恒指上周五(22日)嘅收市價比較嘅話，指數仍然靠近上方熊證。
嚟至9點21分，恒指開市報26020點，跌106點，開始接近牛熊證中間位置，如果純以街貨量多少同埋遠近比較，指數仍然向上殺熊較有利，不過，恒指由10月5日低位23681點回升至依家9點38分見恒指報26048點，大市已經反彈咗2367點，日線圖上見最近四個交易日，指數喺爆上26000點之後開始要抖抖，Slow STC(14,3)兩線喺超賣水平上都要微微向下運行回一回氣。再睇埋恒指今朝完U盤之後，五分鐘圖見保歷加通道口拓闊，小時圖長期處於保歷加上升通道都變返落下降通道範圍，所以都有喺聊天室裡頭話第一注可以出淡倉。
到正式開市，指數緩緩向下，大約接近10點左右，指數有一下跌過落26000點以下水平，跌幅大約有190幾點，但好快已經縮返上去，還好聊天室出DT淡倉已火速收回，仲反手出埋好倉，真係打字都唔夠個市轉得快。做DT，就係要咁手快。
依家10點25分，指數已經由跌轉升，雖然一度失守26000點，不過好友扯返指數嘅速度實在太快；另外，今日其實都有26100至26199點嘅新熊上市，所以喺街貨圖上仲未呈現到出嚟，指數仍然靠近熊證。恒指牛(63202)，收回價25648點，同現價有逾430點距離，逾55倍槓桿夠DT使用，進取嘅留意指數喺五分鐘圖上回返落保歷加通道時如有支持先至出手，博指數繼續於保歷加上升通道運行；安全嘅亦都可以等Slow STC(14,3)回返落去超賣水平時先至落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
