噚日出咗隻恒指熊(55759)，喺噚日上半場見Slow STC(14,3)出超買再超買時落場，揸過過Lunch返嚟喺大約2點鐘到，終於都見Slow STC(14,3)喺五分鐘圖上回返落去超賣水平，至2點20分左右又再回升，喺呢20分鐘內走隻(55759)最好不過，按呢段時間(55759)高低位做過0.073元/0.068元計，平均沽貨價為0.0705元，換言之呢一趟有11%賺幅，Cover得到朝早失守嗰一注(55750)，果然喺邊度跌低就喺邊度起身，呢種感覺最正！
打咗兩個八號波之後，天氣明顯開始轉涼，望出窗外仍然見藍天，再望望鐘，依家9點21分，恒指做完U盤，開市報25471點，升61點，雖然開市升幅唔係好大，但喺日線圖上以開市呢口價計，指數係上破咗50天線，只係Slow STC(14,3)兩線都上到超買水平，怕且再引更多淡倉入場，博指數再向下回。
就望埋個街貨圖先，今日見牛證終於有25000點以上嘅街貨，最貼價上到25100至25199點，但由於牛證數量唔多，所以都只係得幾十張期指街貨。至於熊證最貼價仍然係25400至25499點，雖然比噚日所見少咗街貨，但都仲有300幾張喺度；再上多層25500至25599點就有多少少，有相當於400幾張期指街貨。
嚟到恒指正式開市，頭嗰15分鐘指數都係咬住喺高位水平，未幾忽然爆上，結果今朝開市首30分鐘指數爆到上25700點以上水平，熊證首三層街貨全數死亡，呢度夾埋有相當於1075張期指。去到10點打後指數開始於高位橫行，指數搶到咁高真係好想出DT淡倉，奈何指數目前企喺熊證街貨層，又係技術分析VS街貨嘅時侯，根據過往非官方統計經驗，十次有八次都係街貨贏，今次都唔例外。所以喺聊天室裡面，博五分鐘圖今朝出疑似「射擊之星」嘅物體失敗後，至10點正出過第二次，但都唔敢好似第一次咁輕舉妄動，至依家10點14分，指數於高位橫行中，似乎等50分鐘線(五分鐘圖10線)上嚟比個梯級指數再踩住去咁款。
睇返恒指日線圖，多番成為阻力嘅50天線終於都被指數上破咗，但同時都見Slow STC(14,3)%K線上到嚴重超買範圍，而%D線則勢頭仍然向上中。落返一層去到小時圖，其 都見到Slow STC(14,3)上到超買，呢啲位玩捉轉角真係好過癮，但點捉都捉唔到亦令人氣餒；硬追好倉又要擔心Slow STC(14,3)忽然轉勢，因為喺五分鐘圖上今朝至依家10點34分，指數根本從來都無出現企住50分鐘線再上，連一條支持線都無出現嘅情況下踩空上，硬出只能單靠指數向上殺熊證街貨呢一個點而進行。
依家10點36分，指數最做過25808點，換言之首四層熊證街貨全數死亡；再等到10點47分，真係坐咗喺度成朝，依家先開始見到指數踩住50分鐘線，不過依家恒指升幅都擴大至逾300幾點，再追好倉博指數再向上殺，雖然食用範圍隨時少咗，但安全為上。
恒指牛(61935)，收回價25200點，同現價有逾500點差距，逾43倍槓桿夠DT玩，進取嘅見50分鐘線企得穩嘅話就出，但都要小心行緊超買再超買嘅Slow STC(14,3)呀！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
