噚日隻恒指熊(53875)講好目標喺五分鐘圖嘅保歷加通道底線，但實在是等得太耐啦，無辦法啦，保歷加通道又橫又窄，指數喺下半場悶局又幾乎係指定動作。終於喺下晝大約2點20分時，見到指數掂到條保歷加通道底線，再過多10分鐘，指數已經又作勢離開底線，就以呢10分鐘，指數喺五分鐘圖掂到保歷加通道底線而走隻(53875)，以當時(53875)高低位做過0.088元/0.075元同，平均沽貨價為0.0815元，剛好比噚日嘅平均買入價多大約十格到，平均賺幅為14.8%；而噚日都有戰友喺第一日新開張嘅喺聊天室裡面表示有正數。
噚晚見到美股又冧過，今朝日經都跌逾600點，港股梗係跌埋一份啦，做完U盤之後開市報23771點，先殺牛證首兩層街貨。到正式開市之後見指數再向下插落，依家9點38分，恒指暫時最低做過23681點，即係話連第三層嘅牛證都被個市殺埋，今日開市五分鐘唔夠個市已經殺咗相當於1557張期指嘅牛證街貨，再向下落一啲都唔出奇；只係喺今朝五分鐘圖上，第一粒出嘅陰陽燭已見「錘頭」，指數再向下之前或者會回一回氣，上返少少先再落。依家9點49分，我家肥貓玩個新玩具玩到好high，周圍衝、周圍撞，而恒指跌幅亦有所收窄，喺五分鐘圖上見指數慢慢爬返上50分鐘線(五分鐘圖10線)，不過似乎仍然下方牛證街貨太過吸引，連100分鐘線(五分鐘圖20線)都未掂到就已經向下回落，而整條保歷加通道都呈下。
本以為指數按街貨方向是向下運行，所以喺聊天室偷位出完好倉之後再做反手出擊，不過，無幾耐指數又再次回頭向上，被條50分鐘線fake咗之餘，仲睇少咗今朝粒「錘頭」嘅力量，都算，依家要搵個位等有淡倉在手嘅戰友離場...
望望月曆，聽日出《施政報告》，又係林鄭出嚟嘅時間，逢見林鄭市就跌，唔知聽日呢個都市傳說會唔會靈驗？
見住指數咁近牛證街貨，又磨咗成個鐘都未上得返24000點，真心揀定隻恒指熊(54362)，收回價24390點，為市場上最貼價熊證之中槓桿最高，有約34倍，安全嘅都係等Slow STC(14,3)上返去超買水平時先至進場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
