噚日因為恒指小時圖喺開市首半個鐘出咗「十字星」，指數期後被推高到倒升收市，而DT用用嘅恒指牛(57919)亦成功有斬獲。睇返恒指小時圖，原來噚日最後嗰粒燭都係「十字星」，呢種首尾呼應嘅情況都係第一次見(可能係我之前無留意到啫)，同步亦見到指數差唔多上到保歷加通道頂線，Slow STC(14,3)兩線亦於超買至嚴重超買水平向下回落，所以換來今日係恒指低開。
望望月曆，今日係9月最後一個交易日，聽日開始就一連三日假期，同時10月嘅開始亦代表新嘅聊天室將會重新營運，休息咗一個月真係夠皮啦，多謝大家嘅等待同忍耐。
依家9點43分，恒指跌幅略為擴大，至目前見到跌311點，報24352點，唔開五分鐘圖都估到個走勢係裂口向下兼Slow STC(14,3)向超賣方向出發，隨時有喺超賣水平landing，再硬追落去風險比較高，都係睇咗牛熊證街貨圖先。
今日牛熊證街貨圖上見兩邊都無新增街貨，熊證最貼價層24700至24799點有相當於226張期指，重貨區就擺咗係整口點數25000至25099點，有相當於1111張期指。至於牛證方面，最貼價層為24000至24099點，有相當於408張期指，最貼價層退到23400至34399點，呢度有相當於647張期指，不過喺近少少嘅23700至23799點都有逾600張期指。以目前(9點50分)恒指現價報24472點(咦？跌幅大為收窄，即係喺五分鐘圖上Slow STC(14,3)出現咗回升)，對比牛熊證中間價(24700+24099)/2=24399.5點計，依家又近返熊證街貨層。
睇返恒指小時圖，今日喺小時圖上出現嘅第 一粒燭剛好喺保歷加通道中軸上面，係有一下係向下穿過，所以會見到有條下影線喺度。嚟到10點4分，小時圖上出咗今日第二粒燭，指數仍然處於保歷加上升通道裡面，之不過喺恒指五分鐘圖上見指數上破唔到100分鐘線(五分鐘圖20線)之餘，喺上破不遂個位仲出咗「十字星」，前後兩支棍夾埋仲變咗「黃昏之星」。
恒指熊(68529)，收回價24900，同現價有逾500點差距，約33.8倍槓桿夠DT用，先Trade返指數向下以保歷加通道底線/Slow STC(14,3)落到超賣區做住目標先，留意五分鐘圖上整條保歷加通道都係向下運行中；一旦指數繼續再落，隨時喺小時圖上見失守保歷加通道中軸。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
