中秋當晚同我家老爺同佢嘅屋企人做節食飯，食完飯之後望望個電話，見到一個同學嘅miss call，再睇埋佢send比我嘅Message，留言指有個同學喺當日朝早離開咗我哋，消息嚟得太突然，只能覆返同學電話再詳問發生咩事。畢竟人生如此，同學間亦已互相通知，都通知埋當年嘅老師，依家大家都只係等待佢嘅家人Update我哋最新消息，以及內心同佢講句：RIP，但願你去到邊都過得安好。
當我通知老師之後，老師感慨地講咗句：「唉，家陣唔想過節過年！」無辦法啦，無論去到邊，日子總係要過嘅，心情再唔好，工作總係要做。(唔呃你，由領義肥貓第一日開始，我每一日都同自己做定嗰日嘅心理準備)
依家9點38分，連個天都心情唔好，行雷閃電落大雨咩都出齊，不過恒指就非常好天，開市升393點，報24614點，到依家恒指已經擴大升幅至升481點，報24703點，暫時最高曾升逾600點，最高見24827點。呢一下反撲，喺恒指牛熊證街貨圖上見指數已向上拗腰反殺首三層熊證街貨，夾埋有相當於393張期指，最貼價層上移至24800至24899點，呢度有相當於43張期指，而重貨區就喺25000至25099點，都有709張期指街貨喺度。
睇返恒指五分鐘圖，其實指數喺星期二(9月21日)下晝大約2點零之後，Slow STC(14,3)已經上行到超買至嚴重超買水平，呢個情況延續至今，指數大裂口爆上Slow STC(14,3)亦無得落返嚟。至於小時圖方面就見到指數目前重返保歷加上升通道裡面，Slow STC(14,3)兩線當然呈上，而喺9點48分見到保歷加通道頂線仲有少少向上拓嘅情況添。
至於日線圖方面，見指數今日裂高開但同10天線都似乎仲有啲距離，不過，騰訊(00700)日線圖上見股價暫時受制於10天線，阿里巴巴(09988)日線圖更未見Slow STC(14,3)兩線回升嘅情況，友邦(01299)更逆市下行，仲要支陰燭都唔細，三大佔比恒指最重嘅藍籌都咁嘅樣，搞到我有啲擔心恒指會高開低走。
都係索性用返一如以往嘅swing trade做法，依家10點正，其實已經見到Slow STC(14,3)喺五分鐘圖上由超買至嚴重超買水平向下行，指數未到50分鐘線(五分鐘線10線)，未知有無支持，沿Slow STC(14,3)向下炒落的話，恒指熊(65043)，收回價25500點，同現價有逾700點差距，25倍槓桿DT都夠用；過得到50分鐘線都要留意埋條100分鐘線(五分鐘圖20線)；如見支持想炒返個市上去，恒指牛(68238)，收問價24150點，同現價有逾600點差距，41倍槓桿夠禾味。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
