話說噚日明明都睇中恒指會向牛證街貨方向而落，就偏偏無出到淡倉，本身朝早嗰陣都還可以，去到下半場都真係無辦法唔話自己蠢。Well，咁我都相信至少唔會得我一個做咗傻事，因為喺FB噚日都有相認到；亦有讀者分享佢大廈嘅管理員叔叔狠心買淡倉嘅原因(仲涉及技術分析添)！都話高手在民間架啦，叔叔好波！
依家9點29分，恒指仲有一分鐘開市，見今朝做完U盤之後，恒指跌192點，報25310點。開埋恒指牛熊證街貨圖見指數又再次踩入牛證第一層25300至25399點，呢層有相當於569張期指，隨時一開市就全數死亡，所以可以望定再對落嘅街貨層，見到下方都有唔少街貨進駐，重貨區就擺咗喺24500至24599點，有相當於1046張期指，呢個位都同之前8月20日低位24581點比較近，都係嘅，望住之前嘅低位做Trade，就博你穿唔過、有支持、見跌定再彈返上去嘅話，傳說中嘅兩條腿就係咁形成。
見到我家肥貓瞓到咁冧(我唔明點解要返轉個頭嚟瞓)，又即係恒指正式開市，喺五分鐘圖上見到保歷加通道口已經拓闊，Slow STC(14,3)由噚日處於超買範圍下行到超賣水平，呢啲位預埋25200至25299點嘅牛證隨時陣亡嘅話，即追淡倉爬格仔最好不過。至於小時圖方面，留意到小時圖保歷加通道口都有拓闊，但Slow STC(14,3)兩線進入超賣至嚴重超賣範圍，同步見%K線作勢兜底升返上%D線，到底小時圖嘅Slow STC(14,3)出觸底回升成唔成功？10點可能就知答案。
睇埋日線圖，其實都見到今日粒燭確認跌穿保歷加中軸兼處於下降通道運行，Slow STC(14,3)兩線勢頭仍然呈下，本身有淡倉嘅當然可以繼續以日線圖Trade博指數到保歷加通道底啦，無嘅話，恒指熊(53436)，收回價26000點，同現價有近700點差距，都係嗰兩個入市玩法，睇下你係邊一類型嘅人啦：進取嘅吼恒指五分鐘圖上破50分鐘線(五分鐘圖10線)失敗而回時偷位進場；安全嘅等返五分鐘圖Slow STC(14,3)上返去超買時先出手，同步留意住小時圖Slow STC(14,3)嘅走向，萬一出現觸底回升的話，(53436)隨時變陣做快閃黨；否則，日線圖見保歷加通道底線低於25000點以下，依家仲開始見到有向下落嘅情況，你明我講咩啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
