忽然好期待今個星期六，除咗係同屋企人提早食中秋做節飯之外(就屋企人放假日子嘛)，貓義工小姐嗰日朝早會上嚟我屋企，探吓我家肥貓，順便睇睇肥貓佢依家嘅情況可唔可以嘗試去摸吓；「成個月都仲未摸？」未架，慢慢嚟啦，就慢到依家啦。
噚日偷雞走咗一轉恒指牛(67232)嘅Swing Trade，去到尾市時喺日線圖上都仲未見到指數可以上得到或者再挑戰多次50天線，所以喺噚日都有提出過要小心50天線嘅阻力，FB上都已經有讀者留意到，安全起見如果小時圖連保歷加通道中軸都失手埋嘅話，淡倉亦可以落場。依家9點31分，恒指開市報26076點，跌244點，小時圖已確認失保歷加通道中軸，相信不論係有留意文章嘅，或者留意FB嘅，依家應該搶緊淡倉。
睇埋恒指牛熊證街貨圖先，今日兩邊都無新增街貨，換言之今日恒指開市呢口價，其實已經向下插返落去牛證第一層26000至26099點呢個位，今日見呢層有相當於244張期指，而打下幾層街貨，每層都有逾300張期指喺度坐鎮。嚟到9點35分，恒指最低見過25996點，第一層牛證街貨即死，25900至25999點嗰360張期指街貨能唔能夠保住條命仔，就要睇下26000點有幾硬淨啦。
繼續八掛返個恒指小時圖，如上文所指保歷加通道喺今朝開市時已告失守，Slow STC(14,3)當然勢頭向下，不過，留意保歷加通道口收窄中。換上天線的話，50小時線(小時圖50線，約25956點)位置，以依雨9點42分最低做過25958點計，爭兩點就到50小時線。
恒指熊(57394)，收回價26606點，同現價有逾600點差距，槓桿逾44倍夠DT用，剛剛見指數再做今日新低25941點，小時圖上50小時線都穿埋，硬闖追入的話留意恒指五分鐘圖Slow STC(14,3)走勢；安全部署嘅當然可以等返Slow STC(14,3)上返超買位先追落場，心急嘅都可以等五分鐘圖上50分鐘線(五分鐘圖10線)或100分鐘線(五分鐘圖20線)落返嚟指數附近做成阻力之後先至偷位落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
