噚日收咗市之後，我前上司帶埋佢個11歲嘅囡上嚟我屋企探我家肥貓，呢位妹妹最近都收養咗一隻流浪BB貓，兩個新手唯有將大家遇過嘅、上網見過嘅、喺獸醫/貓義工上聽過嘅，甚至自己諗出嚟嘅「方法」都開心share，可惜肥貓實在太怕人，全程只係縮埋喺角落頭，比佢最鐘意食嘅餅仔都死忍口唔食，等人哋走晒啦就即刻食。我家老爺話你愈嚟愈肥，要對你(即係我)作出限零食令，又...真係比初初嚟到嘅時候肥咗啲嘅...我家老爺都係為你身體著想，無病病痛啫，咁我哋就忍下啦(一個忍食，一個忍餵)。
噚揀咗隻恒指Call(21566)出嚟，終於喺噚日朝早大約11點5分至11點15分，以平均買入價0.121元偷位落場。
喺噚日下晝開市之後，見住恒指係咁創即日新高，就知到出(21566)方向係正確，但同時見到五分鐘圖Slow STC(14,3)上到嚴重超買位，都有啲擔心佢會喺下晝轉勢，唯有Set定走佬位比自己。喺下晝3點打後基本上有穿過一下走佬位(穿100分鐘線(五分鐘圖20線))，不過初心係博指數企穩小時圖上保歷加通道中軸，而喺下半場返嚟嘅時侯基本上已經達標，再揸落去都只係博保歷加通道口拓闊，比位指數再升高啲。
依家9點22分，恒指做完U盤，報26207點，升43點，先開恒指牛熊證街貨圖，見到牛熊兩邊都無新增街貨層，熊證最貼價層為26200至26299點，換言之恒指開市呢口價已經踩住熊證第一層街貨，不過呢層貨量唔多，只有相當於65張期指。至於牛證方面，最貼價層為25800至25899點，呢層則有相當於177張期指。
終於都正式開市，不過恒指升勢似乎有啲油盡燈枯嘅感覺，依家9點51分，喺小時圖上見到指數有一下上破咗保歷加通道頂線，但Slow STC(14,3)嘅%K線已經出現橫行情況，並作勢計劃準備跌穿%D線，仲做咗「十字星」出嚟(應該到最後會變咗樣)，都係抱住個心態係有咩事走先。
不過，喺恒指五分鐘圖上則見指數今朝早雖然波幅唔高又浮浮沉沉，但嚟到依家10點1分，都仲未失噚日定下嘅走佬位(確認失50分鐘線(五分鐘圖10線)或100分鐘線)，依家(21566)輪價做緊0.127元，總算叫做有六格喺手，都係繼續以噚日定落嚟嘅位做止蝕位，繼續以小時圖Trade上去，一旦見小時圖Slow STC(14,3)轉勢的話，(21566)先至撤退。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
