今朝起身我家老爺餵完我家肥貓之後就轉咗個台去睇今朝柏奧，原來係港隊硬地滾球代表梁育榮出戰對中國隊鄭遠森，爭奪硬地滾球混合BC4級個人賽銅牌，睇到大約9點10分，見到梁育榮最終贏到呢面獎牌，嗰種開心嘅程度不比「劍神」張家朗當日拎金牌低。
今日9月1日，第二季最後一個月正式開始，亦係學生們開學嘅大日子，今朝一早開FB已經見到一堆朋友/同學晨早送佢哋嘅仔女返學，喺學校門口影張相咁，有啲今日正式成為「小學雞」添；作為一個阿姨，呢一刻我希望你哋呢個「Yeah！」可以「Yeah！」到你哋小學畢業啦。
依家9點48分，恒指開市微跌7點後指數明顯向下，不過，如果開五分鐘圖的話就會見到指數目前卡住咗喺保歷加通道中軸，而保歷加通道口由今朝拓闊至依家變成橫行，雖然Slow STC(14,3)開市時見兩線於高位回落，但礙於保歷加通道口實在太窄，至依家9點57分見只有Slow STC(14,3)回落，指數幾近橫行。觀乎恒指喺開市時已經踩入熊證街貨第一層，情況變成街貨VS技術走勢，根據過去經驗十次有八次最後都係街貨贏。
嚟到10點15分，喺五分鐘圖上暫時都係見到指數處於保歷加上升通道運行，開埋天線就見目前都仲有條50天線(五分鐘圖10線)做隻支持，唯有再比多少少時間睇下指數諗定向邊個方向走先啦。
呢啲時侯又八掛下個股，今朝【每日一股】揀咗隻海底撈(06862)出嚟，依家見股價跑贏大市，有逾3%升幅，日線圖畫佢「雙底」果然不負所托；至於噚日最後一隻【業績期大作戰】寫到嘅網易(09999)，依家見升成5%，日線圖20天線果然有料到。但係以小時圖捉今日DT個股的話，十隻有九隻都係等跌，莫非今日條指數係向技術分析方向出發？
過幾十分鐘，睇返條恒指，小時圖上見Slow STC(14,3)%K線向下跌穿咗少少條%D線，個市開咗個鐘，坦白講小時圖絕大部份都見到Slow STC(14,3)兩線處於超買水平且作勢高位回落，難道要等到11點再喺小時圖上出多粒燭先至確認得到Slow STC(14,3)係唔係落？
今日似觀戰或者僅以五分鐘圖保歷加上升通道做好短波幅嘅Swing trade，甚至以五分鐘圖指數踩得住保歷加通道中軸有力再彈嘅時候偷位出恒指牛(62554)，收回價25350點，同現價有逾500點差距，逾51倍槓桿夠刺激，亦適合低波幅環境之下做trade。再三強調小時圖條Slow STC(14,3)兩線上到嚴重超買位作勢回落呢單嘢真係唔係人咁品，高槓桿可以拉大賺幅，同時少少向下郁動都可以拉大蝕幅，所以一旦五分鐘圖失保歷加通道中軸就要隨時做棄船準備，策略上宜且戰且走。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
