噚日揸住隻恒指Put(11475)，set定以五分鐘圖見指數完全企返上100分鐘線(五分鐘圖20線)為止蝕位，還好最後都係無破到呢個位，仲可以一直揸落去。不過去到噚日收市前半個鐘到，見小時圖Slow STC(14,3)出現觸低回升，再望返個五分鐘圖見指數上破咗100分鐘線，於是走(11475)，以噚日喺3點20分至3點30分見確認上破100分鐘線計，(11475)當時高低位做過0.187元/0.185元，平均走貨價為0.186元，對比平均買入價0.163元，賺幅為14.1%，Put嘛，槓桿實無熊證咁高架啦。
依家9點52分，恒指開咗市，差唔多半個鐘指數都好似早幾日咁朝早未瞓醒，仲喺度浮浮沉沉，不過就見指數仲喺處於保歷加上升通道；至於噚日見到小時圖Slow STC(14,3)回升，今朝睇返回升勢頭仍然Keep到，問題在於DMI嘅ADX中見到好似唔係好夠力咁。
望住個市又望下我家肥貓，佢開始瞓著即係代表已經10點幾，恒指開市至今仍然處於保歷加上升通道，小時圖再出多粒燭，雖然小時圖上保歷加通道底線呈上，指數位置都有高到，Slow STC(14,3)都保持上行，不過保歷加通道口有所收窄，指數至今仲未掂到保歷加通道中軸水平，更重要嘅係DMI嘅ADX好似比之前睇嘅走勢仲行低咗。
換個五分鐘圖再睇，load完個圖之後見指數喺五分鐘圖上踩住保歷加通道中軸上行，即刻過去聊天室同戰友們講返聲確認得到中軸係有支持，開好倉即追兼博小時圖上破保歷加通道中軸，有時我想講唔係我打字打得慢(我就嚟喺呢一行堪稱稿王架啦)，10點14分時已見指數升逾200點，小時圖依家燭粒都已經橫跨咗，但可惜都係未見小時圖上保歷加通道口拓闊。
忽然落起大雨又行雷，閂返埋隻窗之後已經見到恒指升幅又稍為回落，係嘅，五分鐘圖上見指數爆上升逾200點嘅同時，Slow STC(14,3)兩線都上到去超買至嚴重超買水平，唔回邊有得升，恒指牛(60190)，收回價24950點，同現價有逾500點差距，槓桿逾46倍夠DT用，進取嘅吼恒指五分鐘圖見踩住50分鐘線(五分鐘圖10線)出小注落場；安全嘅當然等返條Slow STC(14,3)返落嚟先至再入場啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
