噚晚同我家老爺&肥貓喺屋企睇殘奧開幕禮,可能係因為個開幕禮故事好有意思,睇到我好鬼感動;朝早唔睇新聞同個市,轉去睇殘奧游泳比賽,期待香港運動員出場,幫香港爭牌又好,突破佢自己又好,加油呀!鏡頭一轉已見陳睿琳喺女子100米蝶式破殘奧紀碌,以首名出線。
噚日臨收市前見恒指五分鐘圖至小時圖Slow STC(14,3)都頂到上天花板,於是嘗試出淡倉博過夜,唔同戰友所承受能力唔同,有人出貼價熊,有人出打不死嘅Put,結果今朝早恒指開市再彈逾200幾點,少量戰友貼價熊陣亡,而打不死嘅Put則留守到依家10點8分,恒指一度見轉燈倒跌,不過喺五分鐘圖上見保歷加通道中軸似有支持;換個小時圖則見到指數下方有50小時線(小時圖50線)似做支持,唯有再等下五分鐘圖恒指有無計向下破得到條保歷加通道中軸先再算,事關恒指今朝早已經先殺兩層最貼價熊證,現時指數雖然回落返去25760點(@10點13分),但呢個位仍然同上方熊證比較近。
恒指暫呈高開低位,噚日揀咗隻今日出業績嘅小米(01810)出嚟,仲喺噚日朝早硬闖咗隻小米牛(56967),今朝更係拿拿聲走,喺五分鐘圖上見小時第一粒燭出高位「十字星」都知佢咩料,以開市首10分鐘走佬,(56967)高低位0.066元/0.0620元計,平均走佬價為0.064元,同噚日嘅平均買入價0.054元比,平均賺幅為18.5%。
依家10點19分,恒指確認下行,今朝個開市裂口都已經補返,指數喺五分鐘圖上都見失守埋保歷加通道中軸,所以都有同聊天室嘅戰友講定,手快嘅下望五分鐘圖嘅保歷加通道底先,一旦到底之後恒指Slow STC(14,3)出超賣再超賣的話,大膽啲可以用小時圖嘅Slow STC(14,3)繼續向下trade落去。
換埋日線圖睇,截至依家10點24分,恒指最高做過25982點,技術上又係喺20天線前止步,然後倒車向下走,而噚日都有講過恒指日線圖上已出現「終極死亡交叉」。恒指Put(11475),行使價25600點,同現價只有0.8%價外,唔緊要,到價內又再換馬,只係想保持可以食住有由價外變價內嘅內含價值同時間值,今年11月29日到期,11.36倍槓桿都適合Day Trade,短線如前文所指用五分鐘圖保歷加通道底線做目標又得,睇死恒指被個「終極死亡交叉」同20天線頂死嘅出長少少時間嘅Put又得,同樣地等吼五分鐘圖Slow STC(14,3)見超買先至落場。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
Facebook:https://www.facebook.com/cbbcwar
秒投聊天室:https://bit.ly/31HG6AN