噚日下半場講過，喺大約下晝點半左右恒指無啦啦反手上行到保歷加通道頂部，同時Slow STC(14,3)兩線都上到90以上嘅嚴重超買水平，呢個位的確符合咗採安全策略嘅投資者落隻(17917)，不過，再多一步嘅係可以再觀察一下指數上到保歷加通道頂之後，頂線有沒有拓闊？Slow STC(14,3)會唔會有機會出到超買再超買？整條保歷加通道會唔會慢慢轉向呈上？更重要嘅係小時圖Slow STC(14,3)同指數出唔出到觸底反彈？集齊上述所有印花嘅話，當然係要反手出返好倉啦，否則再出淡倉就要採取且戰且走嘅策略。
依家逐條問題擊破！
問：保歷加通道頂線有沒有拓闊？
答：有！不過去到1點50分開始見橫行，無再拓闊落去
問：Slow STC(14,3)會唔會有機會出到超買再超買？
答：無！因為喺1點40分至1點50分已經見到Slow STC(14,3)%K線跌穿%D線，走勢向下
問：整條保歷加通道會唔會慢慢轉向呈上？
答：無！因為當保歷加通道口無再拓闊嘅同時，整條通道變成橫行
問：小時圖Slow STC(14,3)同指數出唔出到觸底反彈？
答：只係得Slow STC(14,3)仲見到%K線上破%D線，但指數繼續沿保歷加通道底線下行
四個問題裡面有3.5個都係無，印花集唔齊就唔係出好倉啦，淡倉出動當用返(17917)嚟計，以答問題裡面開始發現到有轉勢嘅時間，即約1點40分至1點50分起計，(17917)高低位為0.212元/0.206元計，平均買入價為0.209元。
呢一趟落場都比較有啲意外，事關本身諗住指數都跌咗咁多，再下行嘅空間都似係有限，結果一嘢向下插到底，最25300點都失埋，(17917)輪價亦見搶火。及至2點45分，指數再次挑戰50分鐘線，不過等到3點後見指數挑戰不果，(17917)亦無需要走，持貨至3點後，恒指向下伸多一腳，25200至25299點牛證全死，指數跌逾600點，看來這一注淡倉可以幫我8月份嘅倉打返個和。
「咁隻(17917)又揸到幾時？」嘿！你又啱喎，老老實實呢幾日掛住睇市跌，都無為意要幫隻 日線Put做止賺喎。今朝未開市，如常喺聊天室度同大家睇咗個新嘅街貨圖，同埋回顧噚日走勢，見到有戰友講到「原來到咗恒指日線保底，唔知會唔會頂住吓」，提醒咗我咪只係掛住條20天線，都要望下條保歷加通道，見到日線圖保歷加通道口收窄，Slow STC(14,3)兩線都進入咗超賣範圍。咁啦，就以恒指日線保歷加通道底為(17917)嘅目標啦。
餵完我家肥貓食早餐之後(其實一隻兩歲幾三歲嘅貓一日要食幾多嘢？有無人可以話我知呀，我只係覺得佢唔係食就瞓咋)，恒指開市跌70幾點，到依家9點46分，恒指跌幅擴大，連25000點都無埋，今朝早喺聊天室無同大家講再搶淡倉，明白到指數現水平近牛，唔落去殺牛都無咩好做，但所有圖嘅Slow STC(14,3)都落到去超賣至嚴重超賣水平，開始擔心會忽然出技術反彈，走避不及就麻煩。唯一可以做嘅就係等恒指跌定回一回之後睇下有無計彈返高少少，比個位偷嚟落場。
望返日線圖，指數如預期般落到保歷加通道底部，仲插穿埋添，(17917)到達目標，今日又星期五，Happy Friday之下都係食咗先算，以今朝9點40分至9點50分恒指穿25000點同時都穿埋保歷加通道底線，(17917)高低位做過0.26元/0.239元，平均沽貨價為0.2495元，對比噚日嘅平均買入價，平均賺幅為19.4%。
之後嘅事就之後再算，袋咗落袋先係錢嘛。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
