噚日揀咗隻恒指Put(11363)出嚟，目的係博恒指日線圖上破唔到20天線，而同時又見到Slow STC(14,3)作勢%K線想跌穿%D線而出手，策略上仍然都係等恒指五分鐘圖上見Slow STC(14,3)出超買時先出手，最終喺噚日大約3點20分至3點30分，見Slow STC(14,3)上得返去超買位，於是(11363)可以出動，按當時(11363)高低位0.22元/0.219元計，平均買入價為0.2195元。
今朝恒指開市，同早幾日一樣都係跌幅唔多，到依家9點40分，恒指叫做一度跌逾百點，不過喺五分鐘圖上就見保歷加通道口好似被人點咗穴，無拓闊又無收窄到；留意返，隻(11363)開出嚟本身係打算以日線圖上破唔到20天線而出嘅，觀乎目前恒指日線圖仍呈下行動作，Slow STC(14,3)仍然未變樣，可以set上破日線圖上破20天線為(11363)嘅止蝕位。
至於噚日喺[下半Part]提過嘅友邦(01299)，本身揀咗隻Put(23350)出嚟，就係博小時圖上股價上破唔到250小時線(小時圖250線)回落，又再次等五分鐘圖見Slow STC(14,3)出超買時小注落場。喺噚日大約下晝3點15分至3點50分呢段時間，就係五分鐘圖Slow STC(14,3)處於超買嘅範圍，呢啲時間入市都基本上都要預咗過夜，按呢段時間(23350)高低位做過0.134元/0.131元，平均買入價為0.1325元。今朝起身見到友邦一早已經出咗業績，唔駛Click入去睇內文都知佢業績靚仔，U盤未完都已經見友邦股價一支箭咁飆咗上去，好彩隻(23350)係Put，不過呢個8月都夠我傷啦，反正都係啦，唯有喺開市之後等股價稍為回返少少落嚟之後先至走人啦。
依家10點2分，恒指呢半個鐘同之前幾日開市初期都係差唔多，未見方向，唯目前肯定嘅係指數仍然處於保歷加上升通道裡面橫行；舊場同事Designer Ken剛剛whatsapp話我知公司最新消息，就係隔離team有個師兄(真係師兄，我同佢同一間大學)星期五將會last day，我都打咗個凸，比係一個比我更加似唔會離辭嘅同事，怕且星期五都可能要返舊場一趟，睇情況啦。
同Ken吹咗陣水，依家已經10點21分，見到恒指走勢似有較明顯嘅方向，同時都見保歷加通道口拓闊咗，不過Slow STC(14,3)就似已經落到底，所以都同聊天室嘅戰友講，如果大家都係用隻(11363)做日線圖淡倉嘅話，咁應該問題唔大啦；反過來如果係搵位做Day Trade嘅話，真係暫時無從入手。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
