噚日收咗市之後，整埋啲手尾就換衫出門口，因為又夠期可以去捐血嘛。定期捐血呢件事我都唔記得由幾時開始，只係知道噚日係我第37次去捐血；不過肯定嘅係初初係被我一位中學同學阿賢感染。
依家9點26分，我家肥貓準備瞓覺，我家老爺出咗門口，即係我準備開市嘅時侯，U盤做完開出26296點，跌221點，以開市呢口價計，牛證第一層新增嘅26300至26399點嘅街貨全數死亡，呢層貨量唔多，都只係得16張，不過由26200至26299點開始向下數落去，每層至少有百幾張期指街貨，第四層25900至25999點更加係重貨區，有相當於490張期指。
睇返隻bookmark咗幾日嘅港鐵(00066)，噚日出咗業績虧轉盈，今日都見股價暫時逆市上行，日線圖上見Slow STC(14,3)低位確認轉勢，股價一下子彈到上10天線(54.34元)附近，以目前(9點40分)做過嘅高位45.5元計，叫做穿咗10天線，不過見五分鐘圖至小時圖嘅Slow STC(14,3)都上到超買水平，應該係因為今朝一開市就爆上所出現的走勢，唔緊要，等佢爆完一輪之後再睇下發生咩事先決定追唔追，事關港鐵雖然係有Call，但喺輪場上佢都算係屬於冷門underlying，隨時出動正股做部署都唔奇；反正一個正常嘅倉裡面，唔止得短線用嘅貨咁Dry。
嚟到9點47分，見到恒指跌幅進一步收窄，喺聊天室上仲未有動作，事關今朝喺五分鐘圖上見到低位出「十字星」後指數上行實屬合理，但同時留意到Slow STC(14,3)出現「頂背馳」，同埋目前整條保歷加通道仍然向下運行中，一旦指數上破唔到50分鐘線(五分鐘圖10線)或者100分鐘線(五分鐘圖20線)，隨時又向牛證街貨出發。
換個小時圖出嚟見到今日粒燭其實已經踩返落去保歷加通道底線，Slow STC(14,3)由噚日一直勢頭向下至依家，雖然兩線目前只係回落到20幾至30幾呢個位，一啲都唔算係超賣(。去到10點11分，恒指忽然一支陽燭向上爆上，一舉上破50分鐘線及100分鐘線，再睇返小時圖見指數踩得住保歷加通道底線上行，Slow STC(14,3)亦見剛剛轉勢，只係保歷加通道口無拓闊反而收窄咗，咁咪睇位做Trade囉。
恒指牛(56527)，收回價25868點，同現價有逾500點差距，槓桿逾49倍適合Day Trade，以小時圖Trade返指數上去，唔貪心先上望保歷加通道中軸先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
