噚日下晝左度右度，都係比較在意恒指小時圖上面條Slow STC(14,3)，於是索性出隻恒指熊(50838)博小時圖Slow STC(14,3)繼續向下，目標設定為10小時線(小時圖10線)。以Patreon出文時間1點33分計，喺五分鐘圖上剛好見到指數上到100分鐘線(五分鐘圖20線)附近，但過多陣再見指數破唔到，於是膽粗粗就可以試將(50838)放落場，以喺五分鐘圖見大約1點35分至1點55分，恒指上破100分鐘線失敗呢段時間嘅高低位0.095元/0.092元計，平均買入價為0.0935元。
都有講過set個目標就係以小時圖上指數落到10小時線就收手，睇返小時圖就會見到由下晝2點至3點粒燭低位剛好落到10小時線(當時為26575點)，以呢個位作為(50838)嘅目標，即係話喺下晝2點25分至2點45分，恒指就大約喺呢個水平附近嘅時候沽走(50838)，以當時高低位0.102元/0.098元，平均沽貨價為0.1元，呢轉偷位出淡倉快執6.95%。
依家9點47分，恒指開市跌36點，之後倒升又再見跌，喺五分鐘圖上由於見到保歷加通道仲係窄窄地嘅關係，所以都試下向個股埋手，咁啱路過見到隻小米(01810)，喺五分鐘圖上見到股價今朝向下衝，Slow STC(14,3)都落到去超賣水平，已經Cap定圖喺聊天室同戰友講定可以試下等等小米會唔會Slow STC(14,3)觸低回升chok返上去，做到一趟swing trade。
嚟到9點52分，已經見到小米股價向上彈返上去，第一關50分鐘線(五分鐘圖10線)已經過咗，問題係第二關嘅100分鐘線(五分鐘圖20線)又睇佢過唔過到啦。
依家10點5分，坦白講真係仲未捉到恒指方向，事關恒指經過噚日窄幅上落，莫講話係保歷加通道，連天線都拿埋一舊，指數郁少少喺走勢圖上已經「一步到位」去咗第二邊，唉，不如睇下恒指牛熊證街貨圖有無新發現好過。
今日見牛熊證街貨圖上，牛證有一層新增街貨，最貼價上移至26200至26299點，量唔多得74張期指，而熊證最貼價為26800至26899點，計計兩者中間位為26549.5點，同恒指依家現價10點16分做緊嘅26590點比，即現價同中間價只係爭40.5點，嚴格嚟講都算叫做企喺中間位唔多郁。
老老實實，恒指悶咗幾日，八掛下個恒指波幅指數(VHSI)到底咩料都好，日線圖見VHSI喺7月27日大幅抽高之後，VHSI就慢慢向下行，數值上由7月27日高位36.49，跌到落嚟依家10點19分見20.01，Slow STC(14,3)都由之前70幾至80嘅超買水平回落到依家超賣至嚴重超賣範圍。VHSI回落怪不得恒指愈嚟愈悶啦，唔通大市係這邊廂等牛熊兩邊街貨再儲多啲同拉返兩者嘅距離近啲，那邊廂就等VHSI出現觸底反彈，然後又可以出一次大波幅做殺街貨狂魔？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
