今朝想郁一郁肥貓啲糧兜同爪板屋嘅位置，可惜失敗因為肥貓見忽然被踢竇，好驚咁樣走入廚房、走入房、走返出廳匿喺Puzzle後面，喺間屋橫衝直撞之後，最後將所有嘢放返原位佢先至走返入佢個竇度，唉，搞到我依家有啲內疚添...
算啦，由得隻肥嘢喺度周圍望啦，市繼續開，依家9點38分，恒指今朝開報26491點，有一段好短嘅時間恒指係見轉跌為升嘅，不過好快又再次見紅。
呢排開市頭嗰浸時間確實有啲難搞，大多數都係等到10點幾時先至捉得到大市嘅方向，尤其是五分鐘圖太窄嘅時侯，更加唔知佢想點，噚日都有同聊天室戰友講，呢啲時侯可以試下轉換其他分鐘圖去睇，試下會唔會搵到方向，例如換個10分鐘圖出嚟，見到指數回落到保歷加通道中軸水平，於是有喺聊天室度講底如果踩得住呢條線嘅話就可以小注試出好倉。
剛剛過咗10點，10分鐘圖上真係見恒指踩住保歷加通道上行，指數暫時高位做過 26707點，換言之熊證第一層街貨26600至26699點全數死亡，呢度街貨又唔係好多，有相當於69張期指，反而26700至26799點打上嘅街貨開始見返有3位數嘅期指張數；不過，30分鐘圖同小時圖嘅Slow STC(14,3)都處於嚴重超買水平，那邊廂恒指現價計又已經處於熊證街貨範圍，唔通今次又係街貨圖 VS 技術分析？如果係嘅話，根據過往嘅經驗，真係十次有八次都係會向街貨方向移動。
嚟到10點14分，見到肥貓又好似之前咁攤開個身瞓覺，我個人都定啲；再睇埋恒指走勢，就係喺頭先踩住10分鐘圖之後再彈高呢一下，走勢直奔26800點咁滯，所有分鐘圖嘅Slow STC(14,3)都已經處於嚴重超買水平，留意返以恒指依家10點16分報26778點計，已經上破返日線圖20天線，亦即係市場近日比較睇得重嘅阻力位。
見到肥貓醒咗，走埋去問佢食唔食嘢又唔答我，放低粒糧之後返嚟見到指數已經上到26800點以上水平，即係話連第二層熊證26800至26899點嘅街貨都死埋，呢度有相當於286張期指街貨，又變相依家26900至26999點成為最貼價層，呢度有相當於468張期指街貨，個市今日會唔會有本事殺埋上去？好難講，但就算係嘅話，都被條Slow STC(14,3)抖抖先啦。
恒指牛(56366)，收回價26200點，同現價有逾480點差距，槓桿最高，適合Day Trade。等等指數同Slow STC(14,3)真係由高位回一回返落嚟先至再博指數向上再殺26900至26999點熊證先，因為幾個分鐘圖嘅Slow STC(14,3)出晒90以上嘅嚴重超買，對於做Swing Trade嚟講都真係會有啲擔心。
所以，都揀定隻恒指熊(50838)，收回價27300點，同現價有逾500點差距，槓桿約34倍都夠Day Trade用。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
